ഇടുക്കി: ഇരട്ടയാര്‍ ഗാന്ധിജി സര്‍ക്കാര്‍ ഇംഗ്ലീഷ് മീഡിയം സ്‌ക്കൂളിലെ കുട്ടികളെ മാനേജ്‌മെന്റ് സ്‌ക്കൂളിലേക്ക് മാറ്റിയ സംഭവത്തില്‍ കുറ്റക്കാര്‍ക്കെതിരെ ഒരു മാസം കഴിഞ്ഞിട്ടും വിദ്യാഭ്യാസ വകുപ്പ് നടപടി എടുത്തില്ല. കട്ടപ്പന വിദ്യാഭ്യാസ ജില്ല ഓഫീസിലുള്ള രണ്ട് ഉദ്യോഗസ്ഥരാണ് സംഭവത്തിനു പിന്നിലെന്ന് ഡിഇഒ റിപ്പോര്‍ട്ട് നല്‍കിയിരുന്നു. 1800 ലധികം കുട്ടികള്‍ പഠിക്കുന്ന സംസ്ഥാനത്തെ ഏക സര്‍ക്കാര്‍ ഇംഗ്ലീഷ് മീഡിയം സ്‌കൂളാണ് ഇത്. ജൂണ്‍ പത്തിനാണ് ഇത്തവണ ആറാം അധ്യയന ദിവസത്തെ കണക്കെടുപ്പ് നടത്തിയത്. ഏഴാം തീയതി വരെ സ്‌കൂളിലുണ്ടായിരുന്ന അഞ്ച് കുട്ടികളെ ശനി, ഞായര്‍ എന്നീ അവധി ദിവസങ്ങളില്‍ മറ്റൊരു മാനേജ്‌മെന്റ് സ്‌കൂളിലേക്ക് മാറ്റുകയായിരുന്നു. ഈ കുട്ടികളിലാരും തന്നെ ടിസിക്കായി അപേക്ഷ നല്‍കിയിരുന്നില്ല. പത്താം തീയതിയും സംഭവം ആവര്‍ത്തിച്ചു. ഇതോടെ സ്‌കൂള്‍ അധികൃതര്‍ കട്ടപ്പന ഡിഇഒ യ്ക്ക് പരാതി നല്‍കി. ഡിഇഒ അവധിയിലായിരുന്ന ദിവസം അദ്ദേഹത്തിന്റെ ലോഗിന്‍ ഉപയോഗിച്ച് അനധികൃതമായാണ്  കുട്ടികളെ മാറ്റിയതെന്ന് കണ്ടെത്തി. കട്ടപ്പന വിദ്യാഭ്യാസ ജില്ല ഓഫീസിലെ ജൂനിയര്‍ സൂപ്രണ്ടും സെക്ഷന്‍ ക്ലര്‍ക്കുമാണ് ഇതിനു പിന്നിലെന്നും നടപടിയെടുക്കണമെന്നും കാണിച്ച് ഡെപ്യൂട്ടി ഡര്‍റക്ടര്‍ക്ക് ഡിഇഒ റിപ്പോര്‍ട്ട് നല്‍കി. സ്‌കൂള്‍ അധികൃതരുടെ പരാതിയില്‍ നടപടിയുണ്ടാകുമെന്ന വിദ്യാഭ്യാസ വകുപ്പ് മന്ത്രിയുടെ ഉറപ്പും പാഴ് വാക്കായി. ഇതോടൊപ്പം കട്ടപ്പന ഡിഇഒ ഓഫീസ് കേന്ദ്രീകരിച്ച് നടക്കുന്ന അഴിമതികളില്‍ അന്വേഷണം നടത്തണമെന്ന ആവശ്യവും ശക്തമായിട്ടുണ്ട്.