ഇടുക്കി: കട്ടപ്പനയിലെ വ്യാപാരി മുളങ്ങാശേരിയില്‍ സാബുവിന്റെ മരണവുമായി ബന്ധപ്പെട്ട അന്വേഷണം പുരോഗമിക്കുകയാണെന്ന് ജില്ലാ പൊലീസ് മേധാവി ടി കെ വിഷ്ണുപ്രദീപ്. കട്ടപ്പന എഎസ്പി രാജേഷ് കുമാര്‍, കട്ടപ്പന എസ്എച്ച്ഒ ടി സി മുരുകന്‍, തങ്കമണി എസ്എച്ച്ഒ എം പി എബി എന്നിവരടങ്ങുന്ന 9 അംഗ പ്രത്യേക സംഘത്തിനാണ് അന്വേഷണ ചുമതല. സംഭവവുമായി ബന്ധപ്പെട്ട എല്ലാ പരാതികളും അന്വേഷിക്കും. ഭാര്യയുടെ മൊഴി രേഖപ്പെടുത്തിയിട്ടുണ്ട്. ഫോണ്‍ സംഭാഷണം ഉള്‍പ്പെടെ അന്വേഷണ പരിധിയിലുണ്ട്. സിസി ടിവി ദൃശ്യങ്ങള്‍ ഉള്‍പ്പെടെയുള്ള തെളിവുകള്‍ ശേഖരിച്ചുവരുന്നതായും ടി കെ വിഷ്ണുപ്രദീപ് കട്ടപ്പനയില്‍ പറഞ്ഞു.