ഇടുക്കി: ജില്ലയിലെ ആദ്യ ടോള്‍ പ്ലാസയായ ദേവികുളം ടോള്‍ പ്ലാസ ഉടന്‍ പ്രവര്‍ത്തനമാരംഭിക്കും. കൊച്ചി- ധനുഷ്‌കോടി ദേശീയപാതയില്‍ ലാക്കാട് കുരിശടിക്കു സമീപമാണ് ദേവികുളം ടോള്‍ പ്ലാസ.   
ദേശീയപാതയില്‍ ഉള്‍പ്പെട്ട മൂന്നാര്‍ ബോഡിമെട്ട് ഭാഗത്തെ 41.78 കിലോമീറ്റര്‍  371.83 കോടി രൂപ ചെലവഴിച്ച് 6 മാസം മുമ്പാണ് പുതുക്കിപ്പണിതത്. ടോള്‍ പ്ലാസയുടെ നിര്‍മാണം അന്നുതന്നെ പൂര്‍ത്തിയായിരുന്നെങ്കിലും സാങ്കേതിക പ്രശ്‌നങ്ങളും പ്രദേശവാസികളുടെ എതിര്‍പ്പും കാരണം പ്രവര്‍ത്തനം ആരം ഭിച്ചിരുന്നില്ല. ആന്ധ്രയില്‍ നിന്നുള്ള കമ്പനിയാണു ടോള്‍ പിരിവ് ലേലത്തിനെടുത്തിരിക്കുന്നത്. ടോള്‍ പ്ലാസയുടെ 20 കിലോമീറ്റര്‍ ചുറ്റളവില്‍ താമസിക്കുന്ന വാണിജ്യേതര വാഹനങ്ങളുടെ ഉടമസ്ഥര്‍ക്ക് 340 രൂപക്ക് പ്രതിമാസ പാസെടുത്ത് ഈ വഴി സഞ്ചരിക്കാം. കാര്‍, ജീപ്പ്, മറ്റു ചെറുവാഹനങ്ങള്‍ക്ക് ഒരു വശത്തേക്ക് 35 രൂപയും ഇരുവശങ്ങളിലേക്കുമാണെങ്കില്‍ 55 രൂപയും നല്‍കണം. മിനി ബസിന് ഒരു വശത്തേക്ക് 60 രൂപയും ഇരുവശങ്ങളിലേക്കുമാണെങ്കില്‍ 90 രൂപയുമാണ് നിരക്ക്. ബസ്, ട്രക്ക് എന്നിവക്ക് ഒരു വശത്തേക്ക് 125ഉം ഇരുവശങ്ങളിലേക്കുമായി 185മാണ് ടോള്‍ നിരക്ക്. ഭാരവാഹനങ്ങള്‍ക്ക് ഒരു വശം 195, ഇരുവശങ്ങളിലേക്കും 295, ഏഴില്‍ കൂടുതല്‍ ആക്സിലുള്ള വലിയ വാഹനങ്ങള്‍ക്ക് ഒരു വശം 240, ഇരുവശങ്ങളിലേക്കും 355 എന്നിങ്ങനെയും ടോള്‍ നിരക്ക് നല്‍കണം.