ഇടുക്കി: കട്ടപ്പന നഗരസഭ ഭരണസമിതിയുടെ കെടുകാര്യസ്ഥതക്കെതിരെ എല്‍ഡിഎഫ് കൗണ്‍സിലര്‍മാര്‍ നഗരസഭ ഓഫീസ് പടിക്കല്‍ നിരാഹാരസമരം തുടങ്ങി. കേരള കോണ്‍ഗ്രസ് എം സംസ്ഥാന സ്റ്റിയറിങ് കമ്മിറ്റിയംഗം അഡ്വ. മനോജ് എം തോമസ് ഉദ്ഘാടനം ചെയ്തു. കൗണ്‍സിലര്‍മാരായ ഷാജി കൂത്തോടിയില്‍, ബിനു കേശവന്‍, ധന്യ അനില്‍, ഷജി തങ്കച്ചന്‍, ബിന്ദുലതാ രാജു, നിഷാമോള്‍ പി എം എന്നിവരാണ് നിരാഹാരമനുഷ്ഠിക്കുന്നത്. എട്ടാം വാര്‍ഡായ കല്ലുകുന്നിലെ നിരവധി ആളുകളുടെ ആശ്രയമായ അസിപ്പടി റോഡിനെ അവഗണിക്കുന്നതില്‍ പ്രതിഷേധിച്ചാണ് സമരം. 2018ലെ പ്രളയത്തില്‍ തകര്‍ന്ന റോഡ് പുനര്‍നിര്‍മിക്കുന്നതിന് എംഎല്‍എ ഫണ്ടില്‍ നിന്നും മുഖ്യമന്ത്രിയുടെ ദുരിതാശ്വാസ നിധിയില്‍നിന്നുമായി 47 ലക്ഷം രൂപ അനുവദിച്ചിരുന്നു. എന്നാല്‍ നഗരസഭയുടെ കെടുകാര്യസ്ഥതയെ തുടര്‍ന്ന് മണ്ണ് പരിശോധന ഉള്‍പ്പെടെയുള്ള തുടര്‍നടപടി ഉണ്ടായില്ല. സാമ്പത്തിക വര്‍ഷം അവസാനിക്കുമ്പോള്‍ അനുവദിച്ച തുക നഷ്ടപ്പെടുന്ന സ്ഥിതിയാണ്. 10ന് ആരംഭിച്ച സമരം വൈകിട്ട് 5ന് സമാപിക്കും.
എല്‍ഡിഎഫ് നേതാക്കളായ മാത്യു ജോര്‍ജ്, എം സി ബിജു, ടിജി എം രാജു, സി ആര്‍ മുരളി, സാബു പുത്തന്‍വീട്ടില്‍, സിബി സുരേഷ്, സുരേഷ് കൂത്രപ്പള്ളിയില്‍, റോഷന്‍ ചുവപ്പുങ്കല്‍, മജീഷ് ജേക്കബ്, നെജി മുഹമ്മദ് തുടങ്ങിയവര്‍ പങ്കെടുത്തു.