ഇടുക്കി: ദലിത് സമൂഹത്തെയും സ്ത്രീ സമൂഹത്തെയും പരസ്യമായി അപമാനിച്ച അടൂര്‍ ഗോപാലകൃഷ്ണന്‍ പൊതുസമൂഹത്തോട് മാപ്പ് പറയണമെന്നാവശ്യപ്പെട്ട് ദലിത് സംയുക്ത സമിതി കട്ടപ്പനയില്‍ പ്രതിഷേധ കൂട്ടായ്മ സംഘടിപ്പിച്ചു. ദലിത് സംയുക്ത സമിതി രക്ഷാധികാരി സി എസ് രാജേന്ദ്രന്‍ ഉദ്ഘാടനം ചെയ്തു. ദലിത് സമൂഹത്തെയും സ്ത്രീത്വത്തെയും അപമാനിക്കുകയും അവഹേളിക്കുകയും ചെയ്ത അടൂര്‍ ഗോപാലകൃഷ്ണന്‍ സാംസ്‌കാരിക കേരളത്തിന് അപമാനമാണെന്ന് അദ്ദേഹം പറഞ്ഞു. സമിതി ജനറല്‍ കണ്‍വീനര്‍ സാജു വള്ളക്കടവ് അധ്യക്ഷനായി. വിവിധ സംഘടന നേതാക്കളായ കെ കെ സുശീലന്‍, പെണ്ണമ്മ രാജന്‍, മനോജ് വടക്കേമുറി, തങ്കമ്മ കാഞ്ചിയാര്‍, രാജുമോന്‍ എ, സുനീഷ് കാഞ്ചിയാര്‍ എന്നിവര്‍ പങ്കെടുത്തു.