ഇടുക്കി: മൂന്നാറില്‍ ജനവാസമേഖലയില്‍ കാട്ടാന ശല്യം തുടരുന്നു. പതിവുപോലെ പടയപ്പയാണ് പ്രശ്നക്കാരന്‍. മൂന്നാര്‍ ചെണ്ടുവാരയിലാണ് കഴിഞ്ഞ കുറച്ച് ദിവസങ്ങളായി പടയപ്പ നിലയുറപ്പിച്ചിരിക്കുന്നത്. പ്രദേശത്ത് വന്‍ കൃഷിനാശമാണ് വിതച്ചിരിക്കുന്നത്. മറയൂരില്‍ കാട്ടാന ശല്യം നിലനില്‍ക്കെയാണ് മൂന്നാറിലും ജനവാസ, തോട്ടം മേഖലയില്‍ പടയപ്പയുടെ സാന്നിധ്യം തൊഴിലാളി കുടുംബങ്ങള്‍ക്ക് തലവേദനയാകുന്നത്. പതിവായി എസ്റ്റേറ്റ് മേഖലകളിലൂടെ ചുറ്റിത്തിരിയുന്ന കാട്ടുകൊമ്പന്‍ ആളുകളുടെ ജീവിതത്തിന് തടസമാകുന്നുവെന്നാണ് പരാതി. മുമ്പ് മഴക്കാലത്ത് കാട് കയറിയിരുന്ന ഇവ വേനല്‍ക്കാലത്തായിരുന്നു ജനവാസ മേഖലയില്‍ തിരികെയെത്തി തീറ്റ തേടിയിരുന്നത്. ശാന്തസ്വഭാവമുള്ള പടയപ്പ ഇപ്പോള്‍ ആക്രമണം സ്വഭാവം പുറത്തെടുക്കുന്ന സ്ഥിതിയുമുണ്ട്. ഇത് തൊഴിലാളി കുടുംബങ്ങളില്‍ ആശങ്ക ഉയര്‍ത്തുന്നു. ജനവാസമേഖലയില്‍ നിന്ന് പടയപ്പയെ ഉള്‍വനത്തിലേക്ക് മാറ്റണമെന്ന ആവശ്യം ശക്തമായിരിക്കുകയാണ്.