ഇടുക്കി: കാഞ്ചിയാര്‍ സ്വരാജില്‍ അപകടങ്ങള്‍ തുടര്‍ക്കഥയാകുന്നു. മലയോര ഹൈവേ നിര്‍മിച്ചതിന് പിന്നാലെയാണ്  വളവുകളില്‍ അപകടങ്ങള്‍ ഉണ്ടാകുന്നത്. കഴിഞ്ഞ ദിവസം രാത്രിയില്‍  ഇരുചക്ര വാഹനത്തില്‍ നിന്നും യുവാവ് അപകടത്തില്‍പ്പെട്ടിരുന്നു. ആരുടെയും ശ്രദ്ധയില്‍പ്പെടാതെ കിടന്ന യുവാവിനെ അപകടം നടന്ന് അരമണിക്കൂര്‍ കഴിഞ്ഞാണ് പ്രദേശവാസികള്‍ കണ്ടതിനെത്തുടര്‍ന്ന് ആശുപത്രിയില്‍ എത്തിച്ചത്. അപകടത്തില്‍ യുവാവിന്റെ പരിക്കുകള്‍ ഗുരുതരമാണ്. പാതയില്‍ ഭീകരമായ വളവുകള്‍ നിലനില്‍ക്കുന്നത് തന്നെയാണ് അപകടങ്ങള്‍ പലപ്പോഴും വിളിച്ചു വരുത്തുന്നത്. അമിതവേഗവും റോഡില്‍ വെള്ളക്കെട്ട് ഉണ്ടാകുന്നതും അപകടങ്ങള്‍ക്ക് മറ്റൊരു കാരണമാണ്.  ഓടയുടെ അടക്കമുള്ള നിര്‍മാണ പ്രവര്‍ത്തനങ്ങള്‍ വൈകുന്നതാണ്  റോഡില്‍ വെള്ളക്കെട്ട് ഉണ്ടാവാന്‍ കാരണം ആകുന്നത്. പണികള്‍ അതിവേഗം പൂര്‍ത്തീകരിക്കുകയും  വളവുകളിലെ അപകട ഭീഷണി ഒഴിവാക്കാന്‍ നടപടികള്‍ സ്വീകരിക്കണമെന്നുമാണ് പ്രദേശവാസികളുടെ ആവശ്യം.