ഇടുക്കി: മൂന്നാറിലെത്തിച്ച കെഎസ്ആര്‍ടിസിയുടെ റോയല്‍ വ്യൂ ഡബിള്‍ ഡക്കര്‍ ബസ് എറ്റെടുത്ത് സഞ്ചാരികള്‍. ഒരാഴ്ച പിന്നിടുമ്പോള്‍ മികച്ച പ്രതികരണവും മെച്ചപ്പെട്ട വരുമാനവും നേടിയാണ് ബസ് സര്‍വീസ് നടത്തുന്നതെന്ന് അധികൃതര്‍ പറഞ്ഞു. ദിവസവും മൂന്നാറില്‍ നിന്നാരംഭിച്ച് ആനയിറങ്കല്‍ ജലാശയം വരെ നീളുന്ന മൂന്ന് സര്‍വീസുകളാണ് ബസിനുള്ളത്. ഉയരത്തില്‍ ഇരുന്നുള്ള മൂന്നാറിന്റെ വിശാലമായ കാഴ്ച്ചകള്‍ സഞ്ചാരികളും ആസ്വദിക്കുന്നുണ്ട്. ബസിന്റെ താഴത്തെ ഡക്കറില്‍ 200 രൂപയും മുകള്‍ ഡക്കറില്‍ 400 രൂപയുമാണ് ടിക്കറ്റ് നിരക്ക്. ഓണ്‍ലൈനായും നേരിട്ടും ടിക്കറ്റ് ബുക്ക് ചെയ്യാം. സഞ്ചാരികള്‍ക്ക് പുറമെ തദ്ദേശിയരായ ആളുകളും ഡബിള്‍ ഡക്കര്‍ ബസില്‍ കയറി യാത്ര ചെയ്യാന്‍ എത്തുന്നുണ്ട്. നവ മാധ്യമങ്ങളിലുംബസിന്റെ ദൃശ്യങ്ങള്‍ തരംഗമായി കഴിഞ്ഞു.