ഇടുക്കി: മിശിഹായുടെ പ്രകാശം ഏറ്റെടുക്കുവാനുള്ള വിളിയാണ് ഓരോ ക്രൈസ്തവനുമുള്ളതെന്ന് കാഞ്ഞിരപ്പള്ളി രൂപതാ മെത്രാന്‍ മാര്‍ ജോസ് പുളിക്കല്‍. കാത്തലിക് കരിസ്മാറ്റിക് നവീകരണം കട്ടപ്പന സോണിന്റെ അഭിമുഖ്യത്തില്‍ 16,17,18 തീയതികളില്‍ നടത്തുന്ന ഗ്രാന്റ് കോണ്‍ഫറന്‍സ് 'ജ്യാല 2024' ഇരട്ടയാര്‍ സെന്റ് തോമസ് ഫോറോനാ പള്ളിയില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മിശിഹായുടെ പ്രകാശം ജീവിതത്തില്‍ ഏറ്റെടുക്കുന്നതിനു നമുക്ക് കഴിയണം. വിശ്വാസം ഒരു കാഴ്ചയാണ്. വിശ്വാസത്തെ കാഴ്ചയായാണ് തിരുവചനം പഠിപ്പിക്കുന്നത്. വിശ്വാസത്തിന്റെ വെളിച്ചം എന്ന ചാക്രിക ലേഖനത്തില്‍ ഫ്രാന്‍സിസ് മാര്‍പ്പാപ്പ പറഞ്ഞു വക്കുന്നതും ഇതുതന്നെയാണ്. ലോകത്തില്‍ തിന്മയുടെ ഇരുട്ട് സമൃദ്ധമാണ്. അത് മാറി മിശിഹായുടെ പ്രകാശം ജീവിതത്തില്‍ സമൃദ്ധമാകുവാന്‍ നാം തിരുവചനത്തോട് ചേര്‍ന്ന് ജീവിക്കണമെന്നും മാര്‍ ജോസ് പുളിക്കല്‍ കൂട്ടിച്ചേര്‍ത്തു. പിതാവു തെളിയിച്ച വെളിച്ചത്തില്‍ നിന്നും സബ് സോണ്‍ പ്രതിനിധികള്‍ തിരി തെളിയിച്ചു പകര്‍ന്നു നല്കി.

മോണ്‍ ജോസ് കരിവേലിക്കല്‍ അധ്യഷത വഹിച്ചു. കട്ടപ്പന സോണ്‍ ആനിമേറ്റര്‍ . ഫാ. ജോസഫ് കോയിക്കല്‍, കെ സി ബി സി വൈസ് ചെയര്‍മാന്‍ സെബാസ്റ്റ്യന്‍ താന്നിക്കല്‍, ഫാ.ജോസഫ് പുത്തന്‍പുരക്കല്‍, ബേബിച്ചന്‍ ഇടിയാകുന്നേല്‍, ഫാ. ജോര്‍ജ് ചെരുവംകുന്നേല്‍, ഫാ. ജോസഫ് പന്തലാനിക്കല്‍, ഫാ. കുരുവിള, ഫാ.ജോസഫ് കുറ്റിക്കാട്ട്, സണ്ണി വളവനാട്ട്, സല്‍ജൂ മുറിയാനിക്കല്‍ തുടങ്ങിയവര്‍ സംസാരിച്ചു. ഫാ. കുര്യാക്കോസ് വടക്കേടത്ത് വിശുദ്ധ കുര്‍ബാന അര്‍പ്പിച്ചു. ഗ്രാന്റ് കോണ്‍ഫെറന്‍സിന്റെ രണ്ടാം ദിനമായ ബുധനാഴ്ച ഫാ. ജെയിംസ് കക്കുഴി, സിബിച്ചന്‍ പുത്തേറ്റ്, സാബു കോഴിക്കോട്, ഫാ ജോസഫ് താമരവെളി, ഫാ. ജോസഫ് നടുപറമ്പില്‍ തുടങ്ങിയവര്‍ ക്ലാസുകള്‍ നയിക്കും. 18 ന് ഇടുക്കി രൂപതാ മെത്രാന്‍ മാര്‍. ജോണ്‍ നെല്ലിക്കുന്നേല്‍, ഷാജി വൈക്കത്തുപറമ്പില്‍, മോണ്‍. ജോസ് കരിവേലിക്കല്‍, ഫാ ജേക്കബ് വെള്ള മരുതുങ്കല്‍ തുടങ്ങിയവര്‍ പങ്കെടുക്കും.