ഇടുക്കി: മറയൂരില്‍ ചന്ദന മരങ്ങള്‍ മോഷണം പോകുന്ന സംഭവങ്ങള്‍ വര്‍ധിക്കുന്നു. ചന്ദന റിസര്‍വിലും സ്വകാര്യ ഭൂമികളിലുമായി നില്‍ക്കുന്ന പത്തിലേറെ മരങ്ങളാണ് ഏതാനും മാസങ്ങള്‍ക്കിടെ വെട്ടി കടത്തിയത്. വനപാലകരുടെ നിരീക്ഷണം അധികമായി എത്താത്ത ഇടങ്ങളില്‍ നിന്നാണ് കൂടുതലായും മുറിച്ചുമാറ്റുന്നത്. ചെറിയ വാള്‍ ഉപയോഗിച്ച് മുറിച്ച് ശിഖരങ്ങളില്‍ കയറുകെട്ടി വീഴ്ത്തി തടി കടത്തി കൊണ്ടുപോകുന്നതാണ് രീതി. മുറിച്ചു മാറ്റുന്ന മരങ്ങളുടെയും വേരുകളും പിഴുത് മാറ്റുന്നുണ്ട്. ഇത് സംബന്ധിച്ച് അന്വേഷണം നടത്തുവാനോ തുടര്‍ മോഷണങ്ങള്‍ തടയുവാനോ അധികൃതര്‍ വേണ്ടത്ര ഇടപെടല്‍ നടത്തുന്നില്ലെന്നും  ആക്ഷേപമുണ്ട്. നിലവില്‍ ഈ പ്രദേശത്തെ ഭൂരിഭാഗം ചന്ദന മരങ്ങളും മോഷ്ടിക്കപ്പെട്ടെന്നും അവശേഷിക്കുന്ന മരങ്ങള്‍ സംരക്ഷിക്കാനുള്ള നടപടി സ്വീകരിക്കണമെന്നുമാണ് ആവശ്യം.