ഇടുക്കി: കട്ടപ്പന ബ്ലോക്ക് പഞ്ചായത്തിന്റെ നേതൃത്വത്തില്‍ സാംസ്‌കാരിക വകുപ്പ് വജ്ര ജൂബിലി ഫെലോഷിപ്പ് പദ്ധതിയുടെ ഭാഗമായി സൗജന്യ ചെണ്ട പരിശീലനം ശാന്തിഗ്രാം വിജയ ലൈബ്രറിയില്‍ ആരംഭിച്ചു. ബ്ലോക്ക് പഞ്ചായത്ത് പ്രസിഡന്റ് വി പി ജോണ്‍ ഉദ്ഘാടനം ചെയ്തു. ബ്ലോക്ക് പഞ്ചായത്തംഗവും വിജയ ലൈബ്രറി പ്രസിഡന്റുമായ ലാലച്ചന്‍ വെള്ളക്കട അധ്യക്ഷനായി. ഇരട്ടയാര്‍ പഞ്ചായത്ത് പ്രസിഡന്റ് ആനന്ദ് സുനില്‍കുമാര്‍ മുഖ്യപ്രഭാഷണം നടത്തി. സാംസ്‌കാരിക വകുപ്പ് ജില്ലാ കോ ഓര്‍ഡിനേറ്റര്‍ എസ്. സൂര്യലാല്‍ പദ്ധതി വിശദീകരിച്ചു. ബ്ലോക്ക് പഞ്ചായത്തംഗം ജോസ് സ്‌കറിയ കണ്ണമുണ്ടയില്‍, ക്ലബ് സെക്രട്ടറി എ.സി മാത്യു, ചെണ്ട പരിശീലകന്‍ ബാബു മാത്യു, ഫെലോഷിപ്പ് ആര്‍ട്ടിസ്റ്റുകളായ അനന്ദു എബി, അബിന്‍ ബിജു, കോ ഓര്‍ഡിനേറ്റര്‍ പി എസ് വിനോദ് എന്നിവര്‍ സംസാരിച്ചു. എല്ലാവര്‍ക്കും സൗജന്യമായി കലാപരിശീലനം ലഭ്യമാക്കുന്ന പദ്ധതിയാണ് വജ്ര ജൂബിലി ഫെലോഷിപ്പ്. കട്ടപ്പന ബ്ലോക്ക് പഞ്ചായത്തിന് കീഴില്‍ കഥകളി, നാടകം, ചെണ്ട, ചിത്രരചന, ഫോട്ടോഗ്രാഫി എന്നിവ സൗജന്യമായി പരിശീലിപ്പിക്കുന്നു.