ഇടുക്കി: ഇടമലക്കുടിയില്‍ വീണ്ടും രോഗിയെ കാട്ടിലൂടെ ചുമന്ന് ആശുപത്രിയിലെത്തിച്ചു. കൂടലാര്‍കുടിയിലെ 60 വയസുള്ള രാജാക്കന്നിയെയാണ് കിലോമീറ്ററുകള്‍ ദൂരം ചുമന്ന് അടിമാലി താലൂക്ക് ആശുപത്രിയില്‍ എത്തിച്ചത്. രാജാക്കന്നി ഒരാഴ്ചയായി പനി ബാധിച്ച് ഇടമലക്കുടി പ്രാഥമിക ആരോഗ്യ കേന്ദ്രത്തില്‍ ചികിത്സയിലായിരുന്നു. രോഗം മൂര്‍ഛിച്ചതോടെയാണ് രാജാക്കന്നിയെ കുടിയിലെ ആളുകള്‍ 4 കിലോമീറ്റര്‍ ചുമന്ന് മാങ്കുളത്തിനടുത്തുള്ള ആനക്കുളത്ത് എത്തിച്ചു. ഇവിടെനിന്ന് വാഹനത്തില്‍ അടിമാലി താലൂക്ക് ആശുപത്രിയിലെത്തിക്കുകയായിരുന്നു. രണ്ടാഴ്ച മുമ്പ് പനി ബാധിച്ച് രാജാക്കന്നിയുടെ കൊച്ചുമകന്‍ കാര്‍ത്തി ആശുപത്രിയിലേയ്ക്ക് പോകുംവഴി മരിച്ചിരുന്നു.