ഏറ്റുമാനൂര്‍ പുന്നത്തുറയില്‍ ആംബുലന്‍സ് കാറില്‍ ഇടിച്ച് നാരകക്കാനം സ്വദേശി മരിച്ചു
ഏറ്റുമാനൂര്‍ പുന്നത്തുറയില്‍ ആംബുലന്‍സ് കാറില്‍ ഇടിച്ച് നാരകക്കാനം സ്വദേശി മരിച്ചു
ഇടുക്കി: ഏറ്റുമാനൂര്‍ പുന്നത്തുറയില്‍ നിയന്ത്രണം നഷ്ടമായ ആംബുലന്‍സ് കാറില്‍ ഇടിച്ച് മറിഞ്ഞ് ഒരാള്‍ മരിച്ചു. നാരകക്കാനം സ്വദേശി മെയില്‍ നഴ്സ് ജിതിന്‍ ആണ് മരിച്ചത്. വെള്ളിയാഴ്ച ഉച്ചയ്ക്ക് 2:30ന് ഏറ്റുമാനൂര്‍ പാലാ റോഡില്‍ പുന്നത്തുറകവലയ്ക്ക് സമീപമായിരുന്നു അപകടം. കാഞ്ചിയാറില്‍ നിന്ന് കോട്ടയത്തേക്ക് രോഗിയുമായി പോയ ആംബുലന്‍സാണ് അപകടത്തില്‍പ്പെട്ടത്. ആംബുലന്‍സ് നിയന്ത്രണം നഷ്ടമായി റോഡരികില്‍ നിന്നും തെന്നിമാറി എതിര്‍ദിശയില്‍ നിന്നെത്തിയ കാറില്‍ ഇടിച്ച് മറിയുകയായിരുന്നു. അപകടത്തില്‍ ആംബുലന്‍സിന്റെ ഒരു ഭാഗം പൂര്‍ണമായും തകര്‍ന്നു. കാറിനും സാരമായി കേടുപാടുകള്‍ സംഭവിച്ചിട്ടുണ്ട്. നാട്ടുകാര്‍ ചേര്‍ന്നാണ് പരിക്കേറ്റവരെ ആശുപത്രിയിലെത്തിച്ചത്. ഡ്രൈവറും രോഗികളും അടക്കം മൂന്നു പേര്‍ക്ക് പരിക്കേറ്റു. പരിക്കേറ്റ ആംബുലന്‍സ് യാത്രക്കാരായ നെടുങ്കണ്ടം സ്വദേശികളായ ഷിനി, തങ്കമ്മ എന്നിവരെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. പരിക്കേറ്റവരുടെ നില ഗുരുതരമല്ല. അപകടത്തെ തുടര്‍ന്ന് ഏറ്റുമാനൂര്‍ പാലാ റോഡില്‍ ഗതാഗതം തടസപ്പെട്ടു.
What's Your Reaction?
