മൂന്നാറില്‍ വിനോദസഞ്ചാരികള്‍ക്ക് മര്‍ദനം: 3 യുവാക്കള്‍ക്കെതിരെ വധശ്രമത്തിന് കേസ്
മൂന്നാറില്‍ വിനോദസഞ്ചാരികള്‍ക്ക് മര്‍ദനം: 3 യുവാക്കള്‍ക്കെതിരെ വധശ്രമത്തിന് കേസ്
ഇടുക്കി: മൂന്നാറില്‍ വാഹനത്തിന് സൈഡ് കൊടുക്കുന്നതുമായി ബന്ധപ്പെട്ട തര്‍ക്കത്തിനിടെ വിദ്യാര്‍ഥികളായ വിനോദസഞ്ചാരികളെ ക്രൂരമായി മര്‍ദിച്ച യുവാക്കള്‍ക്കെതിരെ വധശ്രമത്തിന് കേസ്. ആറ്റുകാട് സ്വദേശികളായ കൗശിക്, സുരേന്ദ്രന്‍, അരുണ്‍ സൂര്യ എന്നിവര്‍ക്കെതിരെയാണ് കേസെടുത്തിരിക്കുന്നത്. കഴിഞ്ഞദിവസമായിരുന്നു കേസിനസ്പദമായ സംഭവം. തമിഴ്‌നാട് തൃച്ചിയില്‍ ഹോട്ടല്‍ മാനേജ്‌മെന്റ്് പഠിക്കുന്ന 9 വിദ്യാര്‍ഥികളാണ് മൂന്നാറിലേക്ക് വിനോദസഞ്ചാരത്തിനെത്തിയത്. ഇവര്‍ പള്ളിവാസല്‍ ആറ്റുകാട് വെള്ളച്ചാട്ടം കാണാന്‍ പോകുംവഴിയാണ് ആറ്റുകാട് സ്വദേശികള്‍ സഞ്ചരിച്ചിരുന്ന സ്‌കൂട്ടറിന് സൈഡ് നല്‍കിയില്ലെന്ന് ആരോപിച്ച് വാക്ക് തര്‍ക്കമുണ്ടാകുന്നത്. തുടര്‍ന്ന് സഞ്ചാരികളായ അരവിന്ദ്, ഗുണശീലന്‍ എന്നിവരെ കല്ലുകൊണ്ട് ക്രൂരമായി ആക്രമിക്കുകയും തലയ്ക്ക് ഗുരുതരമായി പരിക്കേല്‍പ്പിക്കുകയും ചെയ്തിരുന്നു. ഇവരുടെ വാഹനം തല്ലി തകര്‍ക്കുകയും മര്‍ദിച്ചു ലയത്തിന്റെ വരാന്തയില്‍ മുട്ടുകുത്തി നിര്‍ത്തുകയും ചെയ്തു. മേഖലയിലെ തൊഴിലാളികള്‍ എത്തിയാണ് പ്രതികളെ പിടികൂടി പൊലീസില്‍ ഏല്‍പ്പിച്ചത്. മര്‍ദിക്കുന്നതിന്റെ ദൃശ്യങ്ങള്‍ സ്ത്രീതൊഴിലാളി മൊബൈലില്‍ പകര്‍ത്തി പൊലീസിന് കൈമാറിയിരുന്നു. മൂന്നാര്‍ എസ്‌ഐ അനില്‍കുമാറിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു. വിനോദസഞ്ചാരികളെ ആക്രമിച്ചാല്‍ ശക്തമായ നടപടിയുണ്ടാകുമെന്നും മൂന്നാര്‍ ഡിവൈഎസ്പി എസ് ചന്ദ്രകുമാര്‍ പറഞ്ഞു.
What's Your Reaction?
