ഇടുക്കി: കാഞ്ചിയാര്‍ പഞ്ചായത്ത് വികസന സദസിന് മാറ്റുകൂട്ടി ഐസിഡിഎസ് കാഞ്ചിയാര്‍ സെക്ടറിന്റെ പ്രദര്‍ശനമേള. ഐസിഡിഎസ് ആന്റ് 50 എന്ന പേരിലാണ് മേള നടത്തിയത്. മന്ത്രി റോഷി അഗസ്റ്റിന്‍ മേള സന്ദര്‍ശിച്ചു. കാഞ്ചിയാര്‍ പഞ്ചായത്തിലെ 30 അങ്കണവാടി പ്രവര്‍ത്തകരുടെ നേതൃത്വത്തിലാണ് വികസനസദസിനോടനുബന്ധിച്ച് പ്രദര്‍ശന മേള ഒരുക്കിയത്. അങ്കണവാടി ഭൗതീക സാഹചര്യം മെച്ചപ്പെടുത്തല്‍, കെട്ടിട നിര്‍മാണം, കൗമാര പെണ്‍കുട്ടികള്‍ക്ക് ഗ്രൂപ്പ് കൗണ്‍സിലിങ്, വയോജനക്ഷേമ പ്രവര്‍ത്തനങ്ങള്‍, ദിനാചരണങ്ങള്‍, ഭിന്നശേഷിക്കാരുടെ ഉന്നമനം, വനിതാശിശു വികസനം എന്നിവയുള്‍പ്പെടെ 200ലധികം ഫോട്ടോഗ്രാഫുകളുടെ ശേഖരം വനിതാശിശു വികസനവകുപ്പ് നടപ്പിലാക്കുന്ന വിവിധ സ്‌കീമുകളുടെ ചാര്‍ട്ടുകള്‍ എന്നിവയുടെ പ്രദര്‍ശനമാണ് ക്രമീകരിച്ചത്. കുട്ടികളുടെ സമഗ്ര വികസനത്തിനായി ഐസിഡിഎസ് വിഭാവനം ചെയ്യുന്ന അനൗപചാരിക പ്രീസ്‌കൂള്‍ വിദ്യാഭ്യാസ തീംചാര്‍ട്ടുകള്‍, സാന്‍ഡ് ട്രേ, പഠനോപകരണങ്ങള്‍, കരകൗശല വസ്തുക്കള്‍ എന്നിവയുടെ പ്രദര്‍ശനവും പഞ്ചായത്ത് തൊഴില്‍ മേളയും സംഘടിപ്പിച്ചിരുന്നു. അമൃതം ന്യൂട്രിമിക്‌സ് വിഭവങ്ങള്‍, പരിഷ്‌ക്കരിച്ച പ്രീസ്‌കൂള്‍ ഭക്ഷണമെനു വിഭവങ്ങള്‍, പോഷണ്‍ തളികകള്‍ എന്നിവയുള്‍പ്പെടുത്തിയ ഫുഡ് കൗണ്ടറും ശ്രദ്ധേയമായി. ഐസിഡിഎസ് സൂപ്പര്‍വൈസര്‍ സ്‌നേഹ സേവ്യര്‍ നേതൃത്വം നല്‍കി.