ഇടുക്കി :നെടുങ്കണ്ടം തൂവൽ വെള്ളച്ചാട്ടത്തിൽ സഞ്ചാരികൾക്ക് നിയന്ത്രണം ഏർപ്പെടുത്തി കലക്ടർ ഉത്തരവിറക്കി. സഞ്ചാരികൾ അപകടത്തിൽപ്പെട്ട് മുങ്ങിമരിക്കുന്ന സംഭവങ്ങൾ ആവർത്തിക്കുന്ന സാഹചര്യത്തിലാണ് നിയന്ത്രണം ഏർപ്പെടുത്തുന്നതെന്ന് ഡോ.ദിനേശൻ ചെറുവാട്ട് അറിയിച്ചു. വെള്ളച്ചാട്ടത്തിൽ സുരക്ഷാ സംവിധാനങ്ങൾ പര്യാപ്തമല്ലാത്തതിനാൽ പൊതുജനങ്ങളുടെ പ്രവേശനം പൂർണമായും നിരോധിക്കണമെന്ന ഉടുമ്പൻചോല തഹസിൽദാരുടെ റിപ്പോർട്ട് കണക്കിലെടുത്താണ് വിലക്കേർപ്പെടുത്തിയത്. വെള്ളച്ചാട്ടത്തിലെ ജലത്തിന്റെ ആഴം, ഒഴുക്കിൻ്റെ ശക്തി, പാറക്കെട്ടുകളുടെ സ്വഭാവം, വെള്ളത്തിനടിയിലെ അപകടസാധ്യതകൾ തുടങ്ങിയവ സന്ദർശകർക്ക് തിരിച്ചറിയാൻ കഴിയുന്നില്ല. ആവശ്യമായ സുരക്ഷാ സംവിധാനങ്ങൾ, അപകടമുന്നറിയിപ്പ് ബോർഡുകൾ, പ്രവേശന നിയന്ത്രണ സംവിധാനങ്ങൾ, അപകടസാധ്യതയുള്ള ഭാഗങ്ങളിലേക്കുള്ള പ്രവേശനം തടയുന്നതിനുള്ള സംവിധാനങ്ങൾ എന്നിവയും നിലവിലില്ല. ആയതിനാൽ അപകടസാധ്യത സംബന്ധിച്ച് അറിവില്ലാത്ത വിനോദ സഞ്ചാരികളും പൊതുജനങ്ങളും ഇവിടെ പ്രവേശിക്കുന്നത് കൂടുതൽ ജീവഹാനിക്ക് ഇടയാക്കുമെന്നായിരുന്നു തഹസിൽദാരുടെ റിപ്പോർട്ട്. ഇതിന്റെ അടിസ്ഥാനത്തിൽ തൂവൽ വെള്ളച്ചാട്ടത്തിലേക്കും അപകടസാധ്യതയുള്ള പരിസരപ്രദേശങ്ങളിലേക്കും പ്രവേശിക്കുന്നതും കുളിക്കുന്നതും ഉൾപ്പെടെയുള്ള വിനോദപ്രവർത്തനങ്ങൾക്ക് വിലക്കുണ്ട്. കഴിഞ്ഞയാഴ്ച അപകടത്തിൽപ്പെട്ട അശ്വിൻ ഉൾപ്പടെ ഇതുവരെ 13 പേരാണ് ഇവിടെ വെള്ളച്ചാട്ടത്തിൽ മുങ്ങിമരിച്ചിട്ടുള്ളത് .