ഇടുക്കി: കട്ടപ്പന നഗരസഭയിലെ ഗതാഗതക്കുരുക്കിന് പരിഹാരം കാണുവാന്‍ 26 ന് ട്രാഫിക്ക് അഡൈ്വസറി കമ്മിറ്റി ചേരും. കട്ടപ്പന പുതിയ ബസ്റ്റാന്റില്‍ പുതിയതായി ആരംഭിച്ച താല്‍ക്കാലിക ഓട്ടോറിക്ഷ പാര്‍ക്കിംഗുമായി ബന്ധപ്പെട്ടാണ് തര്‍ക്കം നിലനില്‍ക്കുന്നത്. ബസ് സ്റ്റാന്റിന് പുറത്ത് ഓട്ടോ റിക്ഷ സ്റ്റാന്റ് ഉണ്ട്. എന്നാല്‍ പെര്‍മ്മിറ്റ് പോലുമില്ലാത്ത മറ്റു സ്ഥലങ്ങളില്‍ നിന്ന് വരുന്ന ഓട്ടോറിക്ഷകള്‍ ബസ് സ്റ്റാന്‍ഡിനുള്ളില്‍ കയറി ട്രിപ്പ് എടുക്കുന്നത് മൂലം സ്റ്റാന്‍ഡില്‍ കിടക്കുന്ന ഓട്ടോകള്‍ക്ക് ഓട്ടം ലഭിക്കാതെ വരുന്നുണ്ട്. ഇത് ചൂണ്ടിക്കാട്ടി ഡ്രൈവര്‍മാര്‍ നഗരസഭയിലും പൊലീസിലും പരാതി നല്‍കിയിരുന്നു. തുടര്‍ന്നാണ് 5 ഓട്ടോറിക്ഷകള്‍ സ്റ്റാന്‍ഡിനുള്ളില്‍ തടസമില്ലാതെ പാര്‍ക്ക് ചെയ്ത് ഓട്ടം പോകുന്നതിന്ന് ട്രാഫിക്ക് റെഗുലേറ്ററി കമ്മിറ്റി താല്‍ക്കാലിക അനുവാദം നല്‍കിയത്. എന്നാല്‍ ഇതിനെതിരെ വ്യാപാരിവ്യവസായി സമിതി രംഗത്ത് വന്നതോടെയാണ് പ്രശ്‌ന പരിഹാരത്തിനായി നഗരസഭയില്‍ ട്രാഫിക്ക് കമ്മിറ്റി ചേര്‍ന്നത്.

26 ന് ട്രെഡ് യൂണിയന്‍ നേതാക്കളെയും ഓട്ടോറിക്ഷ ഡ്രൈവര്‍മാരെയും ഉള്‍പ്പെടുത്തി ട്രാഫിക്ക് അഡൈ്വസറി കമ്മിറ്റി വിളിച്ച് പ്രശ്‌നത്തിന് പരിഹാരം കാണാനാണ് തീരുമാനം. നഗരസഭയില്‍ ചെയര്‍പേഴ്‌സണ്‍ ബീന ടോമിയുടെ അദ്ധ്യക്ഷതയില്‍ ചേര്‍ന്ന കമ്മിറ്റിയില്‍ വൈസ് ചെയര്‍മാന്‍ അഡ്വ: കെ. ജെ ബെന്നി, നഗരസഭ കൗണ്‍നിലര്‍ സിജു ചക്കുംമൂട്ടില്‍,വിവിധ ട്രേഡ് യൂണിയന്‍ നേതാക്കളായ എംസി ബിജു, പികെ ഗോപി , ശ്രീകുമാര്‍, പൊലീസ്, ഓട്ടോറിക്ഷ ഡ്രൈവര്‍മാര്‍ തുടങ്ങിയവര്‍ പങ്കെടുത്തു.