ഇടുക്കി: ജില്ലാ പഞ്ചായത്ത് ഭരണസമിതി നടത്തിയ അനധികൃത നിയമനം റദ്ദാക്കണമെന്ന് യൂത്ത് കോണ്‍ഗ്രസ് ജില്ലാ പ്രസിഡന്റ് ഫ്രാന്‍സിസ് അറയ്ക്കപ്പറമ്പില്‍. ഇടുക്കി വികസന അതോറിറ്റി ജില്ലാ പഞ്ചായത്തില്‍ ലയിപ്പിച്ചപ്പോള്‍ ജീവനക്കാരനെയും ഇവിടെ നിയമിച്ചിരുന്നു. ഇദ്ദേഹം വിരമിച്ച ഒഴിവിലാണ് നിയമവിരുദ്ധ നിയമനം നടത്തിയത്. 2007 മാര്‍ച്ച് 30നാണ് ഇടുക്കി വികസന അതോറിട്ടിയെ ജില്ലാ പഞ്ചായത്തില്‍ ലയിപ്പിച്ച് സര്‍ക്കാര്‍ ഉത്തരവിറങ്ങിയത്. അഞ്ച് വര്‍ഷത്തിലേറെയായി ദിവസവേതനത്തില്‍ ജോലിചെയ്യുന്ന 55 വയസില്‍ താഴെയുള്ള ജീവനക്കാരെ ആവശ്യമെങ്കില്‍ നിലനിര്‍ത്താമെന്നും ഇവര്‍ വിരമിക്കുമ്പോള്‍ തസ്തിക ഇല്ലാതാകുമെന്നും ഉത്തരവിലുണ്ട്. ഇതിന്റെ മറവില്‍ ജില്ലാ പഞ്ചായത്തില്‍ ജോലി ചെയ്തയാള്‍ വിരമിച്ചപ്പോഴാണ് 2007ലെ ഉത്തരവിനെ മറികടന്നുള്ള നിയമനം.
2024 മാര്‍ച്ച് 5ലെ യോഗത്തിലാണ് നിയമനത്തിന് അംഗീകാരം നല്‍കിയത്. എന്നാല്‍ യുഡിഎഫിലെ 6 അംഗങ്ങളും ജില്ലാ പഞ്ചായത്ത് സെക്രട്ടറിയും വിയോജനം അറിയിച്ചിരുന്നു. നിയമനം നടത്താന്‍ അനുമതിയുള്ള തസ്തിക ഇല്ലാത്തതിനാല്‍ പകരം ജീവനക്കാരെ നിയമിക്കുന്നത് നിയമവിരുദ്ധമാണെന്നും പ്രതിപക്ഷ അംഗങ്ങളുടെ വിയോജന കുറിപ്പിലുണ്ട്.
ജീവനക്കാരന്‍ വിരമിച്ചാല്‍ ഈ തസ്തികയില്‍ മറ്റൊരാളെ നിയമിക്കാന്‍ വ്യവസ്ഥയില്ല. 2019ലെ ഉത്തരവ് പ്രകാരം താല്‍ക്കാലിക തസ്തികകളില്‍ നിയമനം നടത്താന്‍ സര്‍ക്കാര്‍ അനുമതിവേണമെന്നും അനുമതിയില്ലാതെയുള്ള നിയമനത്തിന് വേതനം നല്‍കാന്‍ നിയമപരമായി തടസമുണ്ടാകുമെന്നും ജില്ലാ പഞ്ചായത്ത് സെക്രട്ടറി കമ്മിറ്റിയെ അറിയിച്ചിരുന്നു. നിയമവിരുദ്ധ നിയമനം റദ്ദാക്കി ഇതുവരെ നല്‍കിയ ശമ്പളം ഭരണസമിതി അംഗങ്ങളില്‍നിന്ന് ഈടാക്കണമെന്നും ആവശ്യപ്പെട്ട് പഞ്ചായത്ത് ഡെപ്യൂട്ടി ഡയറക്ടര്‍ക്ക് പരാതി നല്‍കുമെന്നും ഫ്രാന്‍സിസ് പറഞ്ഞു. വാര്‍ത്താസമ്മേളനത്തില്‍ യൂത്ത് കോണ്‍ഗ്രസ് ജില്ലാ വൈസ് പ്രസിഡന്റ് ശാരി ബിനു ശങ്കര്‍, അസംബ്ലി പ്രസിഡന്റുമാരായ ആല്‍ബിന്‍ മണ്ണഞ്ചേരില്‍, ആനന്ദ് തോമസ്, മണ്ഡലം പ്രസിഡന്റ് അലന്‍ സി മനോജ്, കെഎസ് യു ജില്ലാ സെക്രട്ടറി അഭിലാഷ് വാലുമേല്‍ എന്നിവരും പങ്കെടുത്തു.