ഇടുക്കി: മലയോര ഹൈവേ നിര്‍മാണം ഇഴഞ്ഞുനീങ്ങുന്നതോടെ കാഞ്ചിയാര്‍ പാലാക്കടയില്‍ യാത്ര ക്ലേശം രൂക്ഷം. കലിങ്കുകളുടെ   നിര്‍മാണം പൂര്‍ത്തീകരിക്കാന്‍ വൈകുന്നത് ഗതാഗത തടസത്തിനും അപകടങ്ങള്‍ക്കും കാരണമാകുന്നുവെന്നാണ് ഉയരുന്ന ആരോപണം. പാലക്കടയിലെ 100 മീറ്റര്‍ ദൂരമാണ് ഇപ്പോള്‍ ടാറിങ് ഉള്‍പ്പടെ ചെയ്യാനുള്ളത്. റോഡ് കുണ്ടും കുഴിയുമായി കിടക്കുന്നതിനാല്‍ മഴപെയ്യുന്നതോടെ വെള്ളക്കെട്ട് രൂപപ്പെടുകയും ഗതാഗത പ്രതിസന്ധി ഉണ്ടാവുകയും ചെയ്യുന്നു. നിര്‍മാണ നടക്കാത്ത  ഭാഗമൊഴിച്ചാല്‍ ഇരുവശങ്ങളിലും ബിഎംബിസി നിലവാരത്തില്‍ ടാറിങ് പൂര്‍ത്തീകരിച്ചിട്ടുണ്ട്.  ഇതോടെ അമിതവേഗത്തില്‍ എത്തുന്ന വാഹനങ്ങള്‍ ഇവിടെ എത്തുമ്പോള്‍ പലപ്പോഴും വേഗത്തില്‍ ബ്രേക്ക് ചെയ്യുകയും  അപകടങ്ങള്‍ ഉണ്ടാകുകയും ചെയ്യുന്നു.   രാത്രികാലങ്ങളില്‍ വഴി പരിചയമില്ലാത്ത ആളുകള്‍ വേഗത്തില്‍ എത്തുന്നതും  അപകടങ്ങള്‍ വിളിച്ചു വരുത്തുന്നു. കലിങ്കിന്റെ നിര്‍മാണം മന്ദഗതിയില്‍ നടക്കുന്നത് ഗതാഗത തടസത്തിനും ഇടവരുത്തുന്നു.  ഒപ്പം കാല്‍നടയാത്രക്കാര്‍ക്കും ഭീഷണി സൃഷ്ടിക്കുന്നു.  അടിയന്തരമായി ഈ ഭാഗത്തെ നിര്‍മാണം പൂര്‍ത്തീകരിക്കണമെന്ന ആവശ്യമാണ് ശക്തമാകുന്നത്.