ഇടുക്കി: ബസ് മുത്തച്ഛന് പുതുജീവന്‍ നല്‍കി രാജകുമാരി എംജിഎം ഐടിഐയിലെ വിദ്യാര്‍ഥികള്‍. പഴമയുടെ പ്രൗഢിയില്‍ തല ഉയര്‍ത്തി നില്‍ക്കുന്ന വാഹനം. ടാറ്റയും മെഴ്സിഡസ് ബെന്‍സും ചേര്‍ന്ന് നിര്‍മിച്ച ബസ് 1962ലാണ് തിരുവനന്തപുരത്തിന്റെ നിരത്തുകളില്‍ ഓട്ടം ആരംഭിച്ചത്. 1965ല്‍ കെഎസ്ആര്‍ടിസിയുടെ ഭാഗമായി. കെഎല്‍ എക്സ് 604 എന്ന നമ്പറില്‍ കേരളത്തിലുടനീളം സര്‍വീസ് നടത്തി. 1978ല്‍ ലാണ് രാജകുമാരി ഐടിഐ ബസ് സ്വന്തമാക്കിയത്. ഏറെ നാളായി വിശ്രമ ജീവിതത്തിലായിരുന്ന ബസ് വിദ്യാര്‍ഥികളുടെ ആഗ്രഹ പ്രകാരം നവീകരിക്കുകയായിരുന്നു. ഒരു ലക്ഷത്തോളം രൂപ ചെലവിട്ടാണ് ബസ് നവീകരിച്ചത്. കേരളത്തിന്റെ പഴയ പടകുതിരയെ കാണാന്‍ നിരവധി ആളുകള്‍ എത്തുന്നുണ്ട്. റീല്‍സായും സ്റ്റോറിയായും സോഷ്യല്‍ മീഡിയായില്‍ നിറയുകയാണ് ഈ ബസ്. കുട്ടികളുടെ പഠനാവശ്യത്തിനൊപ്പം, പൊതുജനങ്ങള്‍ക്ക് പഴയ മോഡല്‍ ബസ് കാണാന്‍ അവസരവും ഒരുക്കുകയാണ് എംജിഎം ഐടിഐ അധികൃതര്‍.