ഇടുക്കി: മേരികുളം കൂരാമ്പാറ പാലത്തിന്റെ കൈവരികള്‍ കെഎസ്ആര്‍ടിസി ബസ് ഇടിച്ച് തകര്‍ന്നതായി പരാതി. മലയോര ഹൈവേ നിര്‍മാണത്തിന്റെ ഭാഗമായാണ് വാഹനങ്ങള്‍ ആലടി കൂരാമ്പാറ പാലം വഴിതിരിച്ചുവിടുന്നത്. ദിവസേന നൂറുകണക്കിന് വാഹനങ്ങള്‍ കടന്നുപോകുന്ന റോഡിന്റെ വീതി കുറവ് ഗതാഗതകുരുക്കിനും അപകടങ്ങള്‍ക്കും കാരണമാകുന്നു. വ്യാഴാഴ്ച കെഎസ്ആര്‍ടിസി ബസ് കടന്നു പോകാന്‍ ശ്രമിക്കുന്നതിനിടെ പാലത്തില്‍ ഇടിച്ചു കൈവരികള്‍ക്ക് കേടുപാടുകള്‍ സംഭവിച്ചിരുന്നു. വാഹനങ്ങള്‍ കടന്നുപോകുന്നതിനാല്‍ പാലത്തില്‍ സ്ഥാപിച്ചിരിക്കുന്ന കുടിവെള്ള പൈപ്പ് ലൈനുകള്‍ക്കും പാലത്തിന് അടിയിലെ കല്‍ക്കെട്ടുകള്‍ക്കും കേടുപാടുകള്‍ സംഭവിച്ചിട്ടുണ്ട്. എത്രയും വേഗം ആലടി പരപ്പ് റൂട്ടിലെ നിര്‍മാണ പ്രവര്‍ത്തനങ്ങള്‍ പൂര്‍ത്തിയാക്കി പാത തുറന്ന് കൊടുക്കണമെന്ന ആവശ്യമാണ് ശക്തമാകുന്നത്.