ഇടുക്കി: കട്ടപ്പനക്ക് സമീപം കറുവക്കുളത്ത് അനധികൃത പാറഖനനം. കട്ടപ്പന വില്ലേജില്‍ ഉള്‍പ്പെട്ട കുത്തകപ്പാട്ട സ്ഥലത്താണ് പാറമട പ്രവര്‍ത്തിക്കുന്നത്. പുലര്‍ച്ചെ 4 മുതലാണ് ഇവിടെ നിന്നും പാറപൊട്ടിച്ച് കടത്തുന്നത്. മേട്ടുക്കുഴിയിലെ നാട്ടുകാര്‍ പാറമടയുടെ പ്രവര്‍ത്തനം സംബന്ധിച്ച് ജില്ല കലക്ടര്‍ക്ക് പരാതി നല്‍കിയിരുന്നു. മൈനിങ് ആന്റ് ജിയോളി വകുപ്പ് അധികൃതര്‍ നടത്തിയ പരിശോധനയില്‍ പാറമട അനധികൃതമാണെന്ന് കണ്ടെത്തുകയും നിരോധന ഉത്തരവ് നല്‍കുകയും ചെയ്തു. ഇതവഗണിച്ച് പ്രവര്‍ത്തനം തുടര്‍ന്നതോടെ വീണ്ടും നിരോധന ഉത്തരവ് നല്‍കി. ഒപ്പം റവന്യൂ  വകുപ്പും നോട്ടീസ് നല്‍കി. ഏലത്തോട്ടത്തില്‍ കുളം നിര്‍മിക്കുകയാണെന്ന് നാട്ടുകാരെ വിശ്വസിപ്പിച്ചാണ് പാറഖനനം നടന്നിരുന്നത്. തങ്കമണി, ഉപ്പുതോട്, കാഞ്ചിയാര്‍, ചതുരംഗപ്പാറ, പാറത്തോട്, വാഗമണ്‍, ഏലപ്പാറ എന്നിവിടങ്ങളിലും അനധികൃത പാറഖനനം നടക്കുന്നതായി കലക്ടര്‍ക്ക് ജില്ല ജിയോളജിസ്റ്റ് റിപ്പോര്‍ട്ട് നല്‍കി. സംഭവം സംബന്ധിച്ച് പൊലീസ് സ്‌പെഷ്യല്‍ ബ്രാഞ്ചും റിപ്പോര്‍ട്ട് കൈമാറിയിട്ടുണ്ട്.