ഇടുക്കി: പൂപ്പാറയില്‍ കാട്ടാനക്കൂട്ടത്തെ കണ്ട് ഭയന്നോടിയ വയോധികന് വീണുപരിക്കേറ്റു. പൂപ്പാറയില്‍ താമസിക്കുന്ന തമിഴ്നാട് സ്വദേശി അന്തോണി(60)ക്കാണ് പരിക്കേറ്റത്. ജോലി കഴിഞ്ഞ് മടങ്ങുന്നതിനിടെയാണ് കോരംപാറയില്‍വച്ച് അന്തോണി കാട്ടാനകളുടെ മുന്നില്‍പെട്ടത്. അന്തോണിക്കൊപ്പം സ്ത്രീ തൊഴിലാളികള്‍ ഉള്‍പ്പെടെയുള്ളവര്‍ ഉണ്ടായിരുന്നു. ഓടി രക്ഷപ്പെടുന്നതിനിടെയാണ് വീണ് പരിക്കേറ്റത്. പൂപ്പാറയില്‍ പ്രഥമശുശ്രൂഷ നല്‍കിയശേഷം തേനി മെഡിക്കല്‍ കോളേജ് ആശുപത്രിയിലേക്ക് മാറ്റി.
കഴിഞ്ഞ ഏതാനുംദിവസങ്ങളായി കാട്ടാനക്കൂട്ടം മേഖലയില്‍ തമ്പടിച്ചിരിക്കുകയാണ്. ഇക്കൂട്ടത്തില്‍ അക്രമകാരിയായ കാട്ടാന ചക്കക്കൊമ്പന്‍ ഉള്ളതായി തോട്ടം തൊഴിലാളികള്‍ പറയുന്നു. തോട്ടങ്ങളില്‍ ആനകള്‍ തമ്പടിച്ചിരിക്കുന്നതിനാല്‍ ഭീതിയോടെയാണ് തൊഴിലാളികള്‍ ജോലി ചെയ്യുന്നത്.