ഇടുക്കി: വ്യാപാരികളുടെ വിവിധ ആവശ്യങ്ങള്‍ ഉന്നയിച്ചുകൊണ്ട് ഫെബ്രുവരി 18ന് നടക്കുന്ന പാര്‍ലമെന്റ് മാര്‍ച്ചിന് മുന്നോടിയായി സമര പ്രഖ്യാപന കണ്‍വെന്‍ഷനും പ്രകടനവും 15ന് ഉച്ചകഴിഞ്ഞ് 2ന് ചെറുതോണിയില്‍ നടക്കുമെന്ന് കേരള വ്യാപാരി വ്യവസായി ഏകോപന സമിതി. സംസ്ഥാന പ്രസിഡന്റ് രാജു അപ്‌സര ഉദ്ഘാടനം ചെയ്യും. വ്യാപാര സ്ഥാപനങ്ങളുടെ വാടകയ്ക്കുള്ള ജിഎസ്ടി പൂര്‍ണമായും പിന്‍വലിക്കുക, ചെറുകിട വ്യാപാര മേഖലയില്‍ ഗ്രാമങ്ങളില്‍ കുത്തകകളുടെ കടന്നുകയറ്റം അവസാനിപ്പിക്കുക, ഓണ്‍ലൈന്‍ വ്യാപാരത്തിന് നിയന്ത്രണങ്ങള്‍ ഏര്‍പ്പെടുത്തുക,  ചെറുകിട വ്യാപാര മേഖലയെ സംരക്ഷിക്കാന്‍ ആവശ്യമായ നിയമ നിര്‍മാണങ്ങള്‍ നടത്തുക തുടങ്ങിയ  ആവശ്യങ്ങള്‍ ഉന്നയിച്ചുകൊണ്ടാണ് കെവിവിഇഎസ് സംസ്ഥാന കമ്മിറ്റിയുടെ നേതൃത്വത്തില്‍ പാര്‍ലമെന്റിലേക്ക് മാര്‍ച്ച് നടത്തുത്തത്. അതിന് മുന്നോടിയായാണ് എല്ലാ ജില്ലകളിലും സമര പ്രഖ്യാപന കണ്‍വെന്‍ഷന്‍ നടത്തുന്നത്. സംസ്ഥാന നേതാക്കളായ കുഞ്ഞാവു ഹാജി, ദേവസ്യ മേച്ചേരി, എസ് ദേവരാജന്‍, എം കെ തോമസ്‌കുട്ടി, ബാബു കോട്ടയില്‍ എന്നിവര്‍ സംസാരിക്കും. ജില്ലാ നേതാക്കളായ നജീബ് ഇല്ലത്തുപറമ്പില്‍, കെ ആര്‍ വിനോദ്, ആര്‍ രമേശ്, പി എം ബേബി, തങ്കച്ചന്‍ കോട്ടക്കകം, ജോസ് കുഴികണ്ടം, വി എസ് ബിജു, ബാബുലാല്‍, ഷിബു തോമസ്, എം കെ തോമസ്, എന്നിവര്‍ നേതൃത്വം നല്‍കും. ഫെബ്രുവരി 18 ന് നടക്കുന്ന പാര്‍ലമെന്റ് മാര്‍ച്ചില്‍ ജില്ലയില്‍ നിന്ന് 500 അംഗങ്ങള്‍ പങ്കെടുക്കും.  വാര്‍ത്താസമ്മേളനത്തില്‍ സണ്ണി പൈമ്പിള്ളില്‍, സിജോമോന്‍ ജോസ്, ജോഷി കുട്ടട, സാജു പട്ടരൂമടം എന്നിവര്‍ പങ്കെടുത്തു.