ഇടുക്കി: കട്ടപ്പന വെള്ളയാംകുടി കെഎസ്ആര്‍ടിസി ജങ്ഷന്‍- വെട്ടിക്കുഴക്കവല റോഡരികില്‍ കലുങ്കിനോടുചേര്‍ന്നുള്ള ഭീമന്‍ ഗര്‍ത്തം വാഹനങ്ങള്‍ക്ക് ഭീഷണി. കഴിഞ്ഞദിവസം ഇവിടെ ബൈക്ക് അപകടത്തില്‍പെട്ട് യാത്രിക്കാരന് ഗുരുതരമായി പരിക്കേറ്റിരുന്നു. റോഡിലെ വളവിലുള്ള കലുങ്കിനും സമീപവാസികളുടെ വീടിന്റെ സംരക്ഷണഭിത്തിക്കുമിടയിലാണ് രണ്ടടി വീതിയും ആറടി താഴ്ചയുമുള്ള കലുങ്കുള്ളത്. ഇവിടെ കുറ്റിക്കാടുകള്‍ വളര്‍ന്നുനില്‍ക്കുകയാണ്. എതിരെ വരുന്ന വാഹനത്തിന് സൈഡ് കൊടുക്കുമ്പോള്‍ അപകടമുണ്ടാകാനുള്ള സാധ്യതയുണ്ട്. കഴിഞ്ഞദിവസമുണ്ടായ അപകടത്തില്‍ വാഹനം പൂര്‍ണമായി തകര്‍ന്നു. ഈഭാഗത്ത് റോഡിന് വീതിയില്ല. രണ്ട് വളവുകളുള്ളതിനാല്‍ എതിര്‍ദിശയില്‍ നിന്നുള്ള വാഹനങ്ങള്‍ അടുത്തെത്തുമ്പോള്‍ മാത്രമേ കാണാനാകൂ. ഗര്‍ത്തിനുമുകളില്‍ സ്ലാബ് സ്ഥാപിച്ച് അപകടഭീഷണി ഒഴിവാക്കണമെന്ന് നാട്ടുകാര്‍ ആവശ്യപ്പെട്ടു.