ഇടുക്കി: കമ്പംമെട്ട്- വണ്ണപ്പുറം റോഡിന്റെ കല്ലാര്‍ പുഴയോട് ചേര്‍ന്നുള്ള നിര്‍മാണം സുരക്ഷ ഉറപ്പുവരുത്താതെയാണെന്ന് ആക്ഷേപം. ചെങ്കുത്തായ മലയില്‍ നിന്നും കുത്തനെ മണ്ണിടിച്ചത്, ഭാവിയില്‍ കൂടുതല്‍ മണ്ണിടിച്ചിലിന് ഇടയാക്കുമെന്നാണ് ഉയരുന്ന ആശങ്ക. പുഴയ്ക്ക് സമാന്തരമായി കടന്നുപോകുന്ന പാതയോട് ചേര്‍ന്ന് മുമ്പ് പലതവണ ചെറിയ മണ്ണിടിച്ചിലുകള്‍ ഉണ്ടായിട്ടുണ്ട്. നിലവില്‍ വീതി വര്‍ധിപ്പിച്ചതോടെ, റോഡരുകില്‍ നിന്നും കുത്തനെ കൂടുതല്‍ മണ്ണെടുത്തു. ഇതോടെ മുകള്‍ ഭാഗത്ത് നിന്നും മണ്ണ് ഇടിഞ്ഞ് വീഴാനുള്ള സാധ്യത വര്‍ധിച്ചു. ഏതാനും ആഴ്ചകള്‍ക്കിടെ പെയ്ത മഴയില്‍ പ്രദേശത്ത് ചെറിയ മണ്ണിടിച്ചില്‍ ഉണ്ടായിട്ടുണ്ട്. രാമക്കല്‍മേട് വിനോദ സഞ്ചാര കേന്ദ്രത്തിലേയ്ക്കും, തമിഴ്നാട്ടിലേയ്ക്കുമടക്കം ദിവസേന നിരവധി വാഹനങ്ങള്‍ കടന്നുപോകുന്ന ഹൈറേഞ്ചിലെ പ്രധാന പാതയാണിത്. എപ്പോഴും വാഹനങ്ങള്‍ കടന്ന് പോകുന്നതിനാല്‍ മണ്ണിടിച്ചില്‍ ഉണ്ടായാല്‍ വന്‍ ദുരന്തത്തിന് ഇടയാക്കും. ഗ്യാപ് റോഡിലെ അശാസ്ത്രീയ നിര്‍മാണ പ്രവര്‍ത്തനങ്ങള്‍ മൂലം, മണ്ണിടിച്ചില്‍ പതിവാകുമ്പോഴാണ്, പാഠം ഉള്‍കൊള്ളാതെ, സുരക്ഷാ നടപടികള്‍ സ്വീകരിക്കാതെ റോഡ് നിര്‍മിക്കുന്നത്.