ഇടുക്കി: അഞ്ചുരുളി വിനോദസഞ്ചാര മേഖലയെ സംരക്ഷിക്കുന്നതില്‍ പഞ്ചായത്തിന് വീഴ്ച സംഭവിക്കുന്നുവെന്ന് പരാതി. മേഖലയിലേക്കുള്ള പാതകളുടെ ശോച്യാവസ്ഥ പരിഹരിക്കുന്നതിന്  പഞ്ചായത്തും ജില്ലാ പഞ്ചായത്തും പരസ്പരം പഴിചാരുന്നതല്ലാതെ നടപടിയില്ല. മാസങ്ങളായി അടഞ്ഞുകിടന്ന  ശൗചാലയം ഓണത്തിനോടനുബന്ധിച്ച് തുറന്നിരുന്നെങ്കിലും വെള്ളത്തിന്റെ അഭാവത്തില്‍  വീണ്ടും അടച്ചുപൂട്ടി. ശൗചാലയത്തിന്റെ പ്രവര്‍ത്തനം സ്ഥിരമായി മുടങ്ങുന്നത് മേഖലയില്‍ എത്തുന്ന വിനോദ സഞ്ചാരികള്‍ക്ക് ബുദ്ധിമുട്ട് സൃഷ്ടിക്കുന്നുണ്ട്. കൂടാതെ അഞ്ചുരുളിയുടെ പരിസരങ്ങള്‍ മുഴുവന്‍ കാടുപടലങ്ങള്‍ മൂടപ്പെട്ട് കിടക്കുന്നത് ശുചിയാക്കാന്‍ പഞ്ചായത്ത് നടപടികള്‍ സ്വീകരിക്കുന്നില്ല.  അഞ്ചുരുളിയുടെ പ്രധാന ആകര്‍ഷണമായ തുരങ്കമുഖത്തേക്ക് പോകുവാനുള്ള വഴിയില്‍ സുരക്ഷാക്രമീകരണങ്ങളില്ലാത്തതും സഞ്ചാരികള്‍ക്ക് ബുദ്ധിമുട്ട് സൃഷ്ടിക്കുന്നു. ഇത്തരം പ്രതിസന്ധികള്‍ അഞ്ചുരുളി വിനോദസഞ്ചാര കേന്ദ്രത്തിലേക്കുള്ള സഞ്ചാരികളുടെ തിരക്ക് കുറയുന്നതിന് കാരണമാകുന്നുണ്ട്.  ഇത് മേഖലയെ ആശ്രയിച്ച് കച്ചവടങ്ങളിലൂടെയും മറ്റും ഉപജീവനം നടത്തുന്നവര്‍ക്കും പ്രതിസന്ധി സൃഷ്ടിക്കുന്നു. അടിയന്തരമായി  അധികൃതര്‍ ശ്രദ്ധ ചെലുത്തി അഞ്ചുരുളി വിനോദസഞ്ചാര കേന്ദ്രത്തിന്റെ പ്രതിസന്ധികള്‍ പരിഹരിക്കാന്‍ വേണ്ട നടപടികള്‍ സ്വീകരിക്കണമെന്നാണ് പ്രദേശവാസികളുടെ ആവശ്യം.