ഇടുക്കി: ഇരട്ടയാര്‍- ശാന്തിഗ്രാം പാലത്തിന്റെ അറ്റകുറ്റപണി ആരംഭിച്ചെങ്കിലും തുടര്‍നടപടികളായില്ല. കനത്ത മഴയില്‍ ഒക്ടോബര്‍ 7നാണ് ഇരട്ടയാര്‍ ശാന്തിഗ്രാം പാലത്തിന്റെ അപ്രോച്ച് റോഡിന്റെ സംരക്ഷണഭിത്തി തകര്‍ന്നത്. ഇതിനെത്തുടര്‍ന്ന് ഇതുവഴിയുള്ള ഗതാഗതം നിരോധിച്ചു. തുടര്‍ന്ന് പ്രതിഷേധങ്ങള്‍ ഉയര്‍ന്നതോടെ ജനപ്രതിനിധികളെത്തി ഫണ്ടുകള്‍ വാഗ്ദാനം ചെയ്യുകയും ഉടന്‍ അപകടാവസ്ഥ പരിഹരിക്കുമെന്ന് ഉറപ്പ് നല്‍കുകയും ചെയ്തു. അപ്രോച്ച് റോഡിന്റെ അറ്റകുറ്റപ്പണികള്‍ ആരംഭിച്ചിരുന്നു. എന്നാല്‍ അശാസ്ത്രീയമായ നിര്‍മാണ പ്രവര്‍ത്തനം നടത്തി പാലത്തിന്റെ താഴ്ഭാഗത്തെ മണ്ണ് മാറ്റിയതല്ലാതെ തുടര്‍ന്നുള്ള പണികള്‍ ഉണ്ടായില്ല. ഇമണ്ണ് നീക്കിയതോടെ ഇതുവഴിയുള്ള കാല്‍നട യാത്രപോലും അപകടാവസ്ഥയിലായി. ഇതോടെ ആശുപത്രി അടക്കമുള്ള അടിയന്തര സാഹചര്യം ഉണ്ടായാല്‍ കിലോമീറ്ററുകള്‍ ചുറ്റി സഞ്ചരിക്കേണ്ടി വരുമോ എന്ന ആശങ്കയിലാണ് പ്രദേശവാസികള്‍.

മേഖലയിലെ രണ്ടുപാലങ്ങള്‍ക്കായി കോടികള്‍ അനുവദിച്ചിട്ട് വര്‍ഷങ്ങളായി. ഇക്കാര്യത്തില്‍ ഫ്‌ളക്‌സ് ബോര്‍ഡുകള്‍ സ്ഥാപിച്ചിരുന്നുവെങ്കിലും പിഡബ്ല്യുഡി സെക്ഷനില്‍ നല്‍കിയ വിവരാവകാശ മറുപടിയില്‍ ഒരുരൂപ പോലും പാലങ്ങള്‍ക്ക് അനുവദിച്ചിട്ടില്ല എന്ന മറുപടിയാണ് ലഭിച്ചത്.  ഇപ്പോള്‍ വീണ്ടും പുതിയ പാലത്തിനായി എസ്റ്റിമേറ്റ് നല്‍കിയെന്ന് അധികാരികള്‍ പറയുന്നു. 1980 കാലഘട്ടത്തില്‍ നിര്‍മിച്ച ഈ പാലങ്ങള്‍ ഉടന്‍ പുനര്‍നിര്‍മിക്കണമെന്ന് ആവശ്യമാണ് ഇപ്പോള്‍ ശക്തമാകുന്നത്. അതിനോടൊപ്പം നിലവിലെ അപകടാവസ്ഥ പരിഹരിക്കാന്‍ അടിയന്തര നടപടി ഉണ്ടാകണമെന്ന  ആവശ്യമാണ് ശക്തമാകുന്നത്. മാസങ്ങളായി ഇത്തരത്തില്‍ അപകടാവസ്ഥ തുടര്‍ന്നിട്ടും പഞ്ചായത്തോ പിഡബ്ല്യുഡി അധികൃതരോ നടപടി സ്വീകരിക്കാത്തതില്‍ പ്രതിഷേധിച്ച് പ്രത്യക്ഷ സമരത്തിന് ഒരുങ്ങുകയാണ് പ്രദേശവാസികളും കോണ്‍ഗ്രസും.