ഇടുക്കി: കട്ടപ്പന ഓസാനം സ്വിമ്മിങ് അക്കാദമിയില്‍ രാജ്യാന്തര നീന്തല്‍ മത്സരം നടത്തി. നഗരസഭാ ചെയര്‍പേഴ്‌സണ്‍ ബീനാ ടോമി ഉദ്ഘാടനം ചെയ്തു. അക്കാദമിയുടെ സ്വിമ്മിങ് പൂളില്‍ നടന്ന മത്സരങ്ങളില്‍ സ്പെയിന്‍, ഫ്രാന്‍സ്, കാനഡ, ജര്‍മനി, ഇറ്റലി രാജ്യങ്ങളില്‍ നിന്നുള്ള താരങ്ങള്‍ ഉള്‍പ്പെടെ 50ലേറെ പേര്‍ മത്സരിച്ചു. ജില്ലയില്‍ നിന്നുള്ള താരങ്ങളും പങ്കെടുത്തു. 14 വയസില്‍ താഴെയുള്ളവരുടെ വിഭാഗത്തില്‍ ആദ്യ മൂന്ന് സ്ഥാനക്കാര്‍ക്ക് 5000, 3000, 2000 രൂപ വീതവും 14 മുതല്‍ 22 വയസ് വരെയുള്ളവരുടെയും 22 വയസിനുമുകളിലുള്ളവരുടെയും വിഭാഗങ്ങളില്‍ യഥാക്രമം 10000, 5000, 3000 രൂപ വീതവും സമ്മാനം നല്‍കി.
സ്‌കൂള്‍ മാനേജര്‍ ഫാ. ജോസ് മാത്യു പറപ്പള്ളില്‍ അധ്യക്ഷനായി. നഗരസഭാ കൗണ്‍സിലര്‍ സോണിയ ജയ്ബി, പ്രിന്‍സിപ്പല്‍ ഫാ. മനു മാത്യു, ഹെഡ്മാസ്റ്റര്‍ ഡേവിസ് ടി ജെ, യുവജന കമ്മിഷന്‍ ജില്ലാ കോ ഓര്‍ഡിനേറ്റര്‍ ജോമോന്‍ പൊടിപാറ, കാര്‍ട്ടൂണ്‍ ചിത്രകാരന്‍ സജിദാസ് മോഹന്‍ തുടങ്ങിയവര്‍ സംസാരിച്ചു. നിരവധിപേര്‍ മത്സരങ്ങള്‍ കാണാനെത്തി. കലാപരിപാടികളും സംഘടിപ്പിച്ചിരുന്നു.