ഇടുക്കി: ചെമ്മണ്ണാറില്‍ മൂത്ത സഹോദരനെയും ഭാര്യയേയും വെട്ടി പരിക്കേല്‍പ്പിച്ച പ്രതിയുടെ വീട്ടില്‍നിന്ന് ലൈസന്‍സ് ഇല്ലാത്ത തോക്ക് കണ്ടെത്തി. സേനാപതി വട്ടപ്പാറ വലിയപറമ്പില്‍ ബിനോയിയുടെ വീട്ടില്‍ നിന്നാണ് തോക്ക് കണ്ടെത്തിയത്. കഴിഞ്ഞ ദിവസമാണ് ബിനോയി സണ്ണിയെയും ഭാര്യ സിനിയേയും ചെമ്മണ്ണാറിലെ ഇവരുടെ വീട്ടില്‍ എത്തി വെട്ടി പരുക്കേല്‍പിച്ചത്. ആക്രമണത്തിനുശേഷം ഇവിടെ നിന്ന് പോയ ബിനോയിയെ വട്ടപ്പാറയിലെ വീട്ടില്‍ നിന്നുമാണ് ഉടുമ്പന്‍ചോാല പൊലിസ് പിടികൂടിയത്. തോക്ക് എവിടെ നിന്നാണ് വാങ്ങിയതെന്നും എന്ത് ആവശ്യത്തിനാണ് വാങ്ങിയതെന്നും സംബന്ധിച്ചും ബിനോയി വ്യക്തമാക്കിയിട്ടില്ല. ഇത് സംബന്ധിച്ച് കൂടുതല്‍ അന്വേഷണം നടത്തുന്നതിനായി ബിനോയിയെ കസ്റ്റഡിയില്‍ വാങ്ങും. തിങ്കളാഴ്ച കോടതിയില്‍ കസ്റ്റഡി അപേക്ഷ സമര്‍പ്പിക്കുമെന്നും ഉടുമ്പന്‍ചോല പൊലീസ് അറിയിച്ചു.  അക്രമണത്തില്‍ പരിക്കേറ്റ സണ്ണിയും ഭാര്യ സിനിയും കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. സ്വത്ത് തര്‍ക്കത്തെ തുടര്‍ന്നാണ് സംഘര്‍ഷമുണ്ടായത്.