ഇടുക്കി: കട്ടപ്പന നഗരത്തില്‍ അനധികൃതമായി വഴിയോര കച്ചവടം നടത്തിയവര്‍ക്കെതിരെ നഗരസഭ ആരോഗ്യ വിഭാഗം നടപടി സ്വീകരിച്ചു. സെന്‍ട്രല്‍ ജംങ്ഷനില്‍ പിക്കപ്പ് വാഹനത്തില്‍ പഴവര്‍ഗ്ഗങ്ങള്‍ വിറ്റ സംഘത്തിനെതിരെയാണ് നടപടി സ്വീകരിച്ചത്. കട്ടപ്പന നഗര സഭയില്‍ വഴിയോര കച്ചവടം നിരോധിച്ചിട്ടുണ്ട്. മുന്‍പ് വഴിയോര കച്ചവടം വര്‍ധിച്ച സാഹചര്യത്തില്‍ വ്യാപാരികള്‍ അടക്കം പ്രതിഷേധവുമായി രംഗത്ത് എത്തിയിരുന്നു. എന്നാല്‍ വിഷയത്തില്‍ പൂര്‍ണമായ പരിഹാരം ഉണ്ടായിരുന്നില്ല. ഈ സാഹചര്യത്തില്‍ വ്യാപാര വ്യവസായി സമിതിയുടെ നേതൃത്വത്തില്‍ നഗരസഭയ്ക്ക് നിവേദനം നല്‍കുകയും, കച്ചവടം പൂര്‍ണമായി നിരോധിച്ചുകൊണ്ട് നഗരസഭ നടപടി സ്വീകരിക്കുകയും ചെയ്തിരുന്നു. മാതൃകാപരമായ നടപടിയാണ് നഗരസഭ ചെയ്തതെന്ന് വ്യാപാരി വ്യവസായി സമിതി യൂണിറ്റ് പ്രസിഡന്റ് മജീഷ് ജേക്കപ്പ് പറഞ്ഞു. ശക്തമായ പരിശോധനയാണ് നഗരത്തില്‍ വഴിയോര കച്ചവടക്കാര്‍ക്കെതിരെ നടത്തുന്നത്. വഴിയോര കച്ചവടം വ്യാപിക്കുന്നത് വഴി നഗരത്തിലെ പല വ്യാപാരികള്‍ക്കും വലിയ പ്രതിസന്ധിയാണ് ഉണ്ടാകുന്നത്. നഗരസഭയുടെ നടപടിക്കൊപ്പം ഗതാഗത തടസമടക്കം ഉണ്ടാക്കി നടത്തുന്ന വഴിയോര കച്ചവടങ്ങള്‍ക്കെതിരെ പൊലീസ് അധികൃതരും നടപടി സ്വീകരിക്കണമെന്ന് വ്യാപാര വ്യവസായി സമിതി അംഗങ്ങള്‍ ആവശ്യപ്പെട്ടു.