കട്ടപ്പന നഗരത്തിലെ വഴിയോരകച്ചവടം നിരോധിക്കണമെന്നാവശ്യപ്പെട്ട് വ്യാപാരി വ്യവസായി സമിതി ധര്‍ണ വ്യാഴാഴ്ച
കട്ടപ്പന നഗരത്തിലെ വഴിയോരകച്ചവടം നിരോധിക്കണമെന്നാവശ്യപ്പെട്ട് വ്യാപാരി വ്യവസായി സമിതി ധര്‍ണ വ്യാഴാഴ്ച
ഇടുക്കി: കട്ടപ്പന നഗരത്തിന്റെ വിവിധ പാതയോരങ്ങളില്‍ വഴിയോര കച്ചവടം വ്യാപകമാകുന്നതില്‍ പ്രതിഷേധിച്ച് വ്യാപാരി വ്യവസായി സമിതി വ്യാഴാഴ്ച നഗരസഭയില്‍ ധര്‍ണ നടത്തുമെന്ന് ജില്ലാ വൈസ് പ്രസിഡന്റ് മജീഷ് ജേക്കബ്. ടൗണിലെ വ്യാപാരികളെ പ്രതിസന്ധിയിലാക്കുന്ന രീതിയിലാണ് കച്ചവടങ്ങള്‍ നടക്കുന്നത്. മുമ്പ് വഴിയോര കച്ചവടം വര്‍ധിച്ചപ്പോള്‍ നഗരസഭയുടെ നിയമങ്ങള്‍ അംഗീകരിച്ചുകൊണ്ട് കച്ചവടം നടത്തുന്ന വ്യാപാരികള്‍ക്ക് ഗുരുതര അവസ്ഥയുണ്ടായി. തുടര്‍ന്ന് വ്യാപാരി വ്യവസായി സമിതിയുടെ നേതൃത്വത്തില്‍ നഗരസഭയില്‍ നിവേദനം സമര്‍പ്പിച്ചിരുന്നു. ഇതിന്റെ തുടര്‍നടപടിയായി വഴിയോരക്കച്ചവടം പൂര്‍ണമായി നിരോധിച്ചുവെന്ന് ഉറപ്പുനല്‍കി സമിതിക്ക് നഗരസഭ കത്തും നല്‍കി.
എന്നാല്‍ ഞായറാഴ്ച ദിവസങ്ങളില്‍ അടക്കം ടൗണില്‍ വ്യാപകമായ വഴിയോരക്കച്ചവടമാണ് ഇപ്പോള്‍ നടക്കുന്നത്. കൂടാതെ വഴിയോര കച്ചവടം നടത്തുന്നതിനെതിരെ നടപടി സ്വീകരിക്കേണ്ട നഗരസഭ ആരോഗ്യ വിഭാഗത്തിന്റെ സ്‌ക്വാഡ് പരിശോധനയും കാര്യക്ഷമമല്ല. ഈ അവസ്ഥ ടൗണിലെ വ്യാപാരികളെ അടച്ചുപൂട്ടല്‍ നിലയിലേക്ക് എത്തിക്കുകയാണ്. വസ്ത്രങ്ങള്‍, ചെരുപ്പുകള്‍, മറ്റ് സാനിറ്ററി വസ്തുക്കള്‍ , ഭക്ഷ്യവസ്തുക്കള്‍ തുടങ്ങിയവയെല്ലാം വഴിയോര കച്ചവടത്തില്‍ ഉള്‍പ്പെട്ടിരിക്കുന്നത്. ഇതില്‍ ഏറിയ കച്ചവടങ്ങളും ഇതര സംസ്ഥാന തൊഴിലാളികളുടേതാണ്. . ഗുണമേന്മ ഇല്ലാത്ത വസ്തുക്കള്‍ അടക്കം അനധികൃതമായി വില്‍പ്പന നടത്തുന്നതോടെ ടൗണിലെ വ്യാപാരികളും പ്രതിസന്ധിയിലാകുന്നു.
തെരുവോര കച്ചവടത്തിന്റെ മറവില്‍ ലഹരി കച്ചവടങ്ങള്‍ നടക്കുന്നതായും സൂചനകള്‍ ഉണ്ട്. നഗരത്തിലെ വ്യാപാരികളെ പ്രതിസന്ധിയില്‍ ആക്കുന്ന വഴിയോരക്കച്ചവടങ്ങള്‍ പരിപൂര്‍ണമായി നിരോധിക്കാത്ത പക്ഷം ശക്തമായ സമരപരിപാടികളിലേക്ക് കടക്കുവാനാണ് വ്യാപാരി വ്യവസായി സമിതിയുടെ തീരുമാനം.
What's Your Reaction?
