ഇടുക്കി: രാജാക്കാട് മുന്നൂറേക്കറിലെ ഏലം സ്റ്റോറില്‍ നിന്ന് ഉണക്ക ഏലക്ക മോഷ്ടിച്ച് വില്‍പ്പന നടത്തിയ കേസിലെ രണ്ടാം പ്രതിയെ രാജാക്കാട് പൊലീസ് കോയമ്പത്തൂരില്‍ നിന്നും അറസ്റ്റ് ചെയ്തു. ഒളിവില്‍ കഴിഞ്ഞിരുന്ന ബോഡിനായ്ക്കന്നൂര്‍ മല്ലിംഗാപുരം സ്വദേശി വിജയ്(27) ആണ് അറസ്റ്റിലായത്. കേസിലെ അഞ്ചും ആറും പ്രതികളായ ബോഡിനായ്ക്കന്നൂര്‍ സ്വദേശികളായ കര്‍ണരാജ(28), മാവടി ചന്ദനപ്പാറ സ്വദേശി മുത്തുക്കറുപ്പന്‍(31) എന്നിവരെ പൊലീസ് നേരത്തെ അറസ്റ്റ് ചെയ്തിരുന്നു. ഒന്നാം പ്രതി ഉള്‍പ്പെടെ മൂന്നുപേര്‍ ഒളിവിലാണ്. കഴിഞ്ഞ ഒക്ടോബര്‍ 19 ന് രാത്രിയാണ് പ്രതികള്‍ മുന്നൂറേക്കറിലെ ഏലം സ്റ്റോറിന്റെ പൂട്ട് പൊളിച്ച് മുറിയില്‍ സൂക്ഷിച്ചിരുന്ന 52 കിലോഗ്രാം തൂക്കം വരുന്ന ഒരുചാക്ക് ഏലക്കായ പ്രതികള്‍ മോഷ്ടിച്ചത്.  ശാന്തന്‍പാറ പുത്തടിയിലെ മലഞ്ചരക്ക് കടയില്‍ ഇതുവിറ്റ ശേഷം പ്രതികള്‍ പണം പങ്കുവച്ചു. മോഷണം നടന്ന എസ്റ്റേറ്റിലെ മുന്‍ജീവനക്കാരനായിരുന്ന തമിഴ്‌നാട് മല്ലിംഗാപുരം സ്വദേശി രാജേഷിന്റെ നിര്‍ദേശപ്രകാരമാണ് പ്രതികള്‍ മോഷണം നടത്തിയത്. സിസിടിവി ദൃശ്യങ്ങള്‍ പരിശോധിച്ച പൊലീസ് ഒക്ടോബര്‍ 27 ന് മല്ലിംഗാപുരത്തെ മദ്യഷാപ്പിന് സമീപം വച്ച് കര്‍ണരാജയെ പിടികൂടി. ഇയാളുടെ മൊഴിയുടെ അടിസ്ഥാനത്തിലാണ് മുത്തുകറുപ്പനെ മാവടിയില്‍ നിന്ന് പിടികൂടിയത്. ഈ രണ്ട് പ്രതികളെയും കോടതി റിമാന്‍ഡ് ചെയ്തിരുന്നു. രാജാക്കാട് സിഐ വി.വിനോദ്കുമാര്‍, എസ് ഐ മാരായ സജി എന്‍. പോള്‍, കെ.എല്‍.സിബി എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.