ഇടുക്കി: വന്യമൃഗ ആക്രമണത്തിനെതിരെ സിപിഐ എം വനംവകുപ്പ് ഓഫീസുകളിലേക്ക് മാര്‍ച്ച് സംഘടിപ്പിക്കുന്നതിനുപകരം മുഖ്യമന്ത്രിയുെട വസതിയിലേക്ക് പ്രതിഷേധം നടത്താന്‍ ധൈര്യം കാട്ടണമെന്ന് യുഡിഎഫ് ചെയര്‍മാന്‍ ജോയി വെട്ടിക്കുഴി ആവശ്യപ്പെട്ടു. മുഖ്യമന്ത്രിയുടെ അനങ്ങാപ്പാറ നിലപാടാണ് വനാതിര്‍ത്തികളില്‍ മനുഷ്യര്‍ കൊലപ്പെടാനുള്ള കാരണം. വനംമന്ത്രിക്കെതിരെ സമരം നടത്തി മുഖ്യമന്ത്രിയെ സംരക്ഷിക്കുന്നതിനുള്ള നീക്കം ജനങ്ങളെ കബളിപ്പിക്കലാണ്. തിരുവനന്തപുരത്ത് ഉന്നതതല യോഗം ചേര്‍ന്നാല്‍ വന്യമൃഗങ്ങള്‍ ഭയപ്പെട്ട് വനത്തിനുള്ളില്‍ ഒതുങ്ങി കഴിയുമെന്ന സര്‍ക്കാര്‍ നിലപാട് വിചിത്രമാണ്. പഞ്ചായത്തുകളില്‍ ജനകീയ സമിതികള്‍ രൂപീകരിച്ചിരിക്കുന്ന വിവരം അറിഞ്ഞാല്‍ കാട്ടുമൃഗങ്ങള്‍ ഭയപ്പെട്ട് ആ പഞ്ചായത്തുകളിലെ കൃഷിയിടങ്ങളില്‍ പ്രവേശിക്കുകയില്ലെന്ന വനംമന്ത്രിയുടെ വെളിപ്പെടുത്തല്‍ തികഞ്ഞ വിഡ്ഢിത്തമാണ്. മൃഗങ്ങള്‍ നിയന്ത്രണാതീതമായി പെറ്റുപെരുകുന്നത് നിശ്ചിത കാലഘട്ടത്തെ നിയന്ത്രിത വേട്ടകൊണ്ട് മാത്രമേ നിയന്ത്രിക്കാന്‍ കഴിയൂ. വനങ്ങളില്‍നിന്ന് മൃഗങ്ങള്‍ പുറത്തിറങ്ങാതെ ഇലക്ട്രിക് വേലികള്‍, സൗരോര്‍ജ വേലികള്‍, ട്രഞ്ചുകള്‍ എന്നിവയുടെ നിര്‍മാണങ്ങളെല്ലാം പ്രഖ്യാപനങ്ങളില്‍ ഒതുങ്ങുന്നു. വനാതിര്‍ത്തികളിലെ ജനങ്ങളെ സുരക്ഷയില്‍ സര്‍ക്കാര്‍ കാട്ടുന്ന അലംഭാവം ക്രൂരതയാണ്. സര്‍ക്കാരിന്റെ ഗുരുതര വീഴ്ചക്കെതിരെ യുഡിഎഫ് ജില്ലാ കമ്മിറ്റി സമരപരിപാടികള്‍ക്ക് രൂപം നല്‍കും. ഭീതിയില്‍ കഴിയുന്ന ജനങ്ങള്‍ക്ക് സംരക്ഷണം ഒരുക്കുന്നതിനും ആത്മവിശ്വാസം പകരുന്നതിനും വനാതിര്‍ത്തികളില്‍ ജനകീയ സമിതികള്‍ രൂപീകരിച്ച് സര്‍ക്കാരിനെതിരെ പോരാട്ടം തുടരുമെന്നും അദ്ദേഹം അറിയിച്ചു.