ഇടുക്കി: ജില്ലയിലെ പട്ടയപ്രശ്നം പരിഹരിക്കാന്‍ വി എസ് അച്യുതാനന്ദന്‍ വലിയ പങ്ക് വഹിച്ചിട്ടുണ്ടെന്ന് സിപിഐ എം ഏരിയാ കമ്മിറ്റിയംഗവും ഓട്ടോ ടാക്സി യൂണിയന്‍(സിഐടിയു) ജില്ലാ പ്രസിഡന്റുമായ കെ ആര്‍ സോദരന്‍. ഹൈറേഞ്ച് മേഖലയില്‍ പട്ടയം നല്‍കരുതെന്ന സുപ്രീംകോടതി വിധിക്കെതിരെ 4 വര്‍ഷം പോരാടി. 2010ല്‍ 15,000 കര്‍ഷകര്‍ക്ക് ഉപാധിരഹിതപട്ടയം നല്‍കാന്‍ വി എസ് സര്‍ക്കാരിന് സാധിച്ചു. അദ്ദേഹം മുഖ്യമന്ത്രിയായിരുന്ന കാലഘട്ടത്തില്‍ ഒട്ടേറെ വികസന പദ്ധതികള്‍ നടപ്പാക്കി. പ്രതിപക്ഷ നേതാവായിരുന്ന കാലഘട്ടത്തിലും ജനങ്ങളുടെ പ്രശ്നങ്ങള്‍ ഉയര്‍ത്തിക്കൊണ്ടുവരാനും സമരങ്ങള്‍ സംഘടിപ്പിക്കാനും നേതൃത്വം നല്‍കി. സംസ്ഥാന സെക്രട്ടറിയായിരുന്ന കാലഘട്ടത്തിലും സംസ്ഥാനത്ത് പാര്‍ട്ടി ശക്തിപ്പെടുത്താന്‍ മാതൃകാപരമായ പ്രവര്‍ത്തനം നടത്തി. അദ്ദേഹത്തിന്റെ വേര്‍പാട് കമ്യൂണിസ്റ്റ് പ്രസ്ഥാനത്തിനും കേരളത്തിനും തീരാനഷ്ടമാണെന്നും കെ ആര്‍ സോദരന്‍ പറഞ്ഞു.