ഇടുക്കി: കൊച്ചി-ധനുഷ്‌കോടി ദേശീയപാതയുടെ ഭാഗമായ വാളറ ടൗണിലെ വഴിയോര വിശ്രമ കേന്ദ്രം കാടുകയറി നശിക്കുന്നു. 1997 ഫെബ്രുവരി 27നാണ് ടൂറിസം വകുപ്പിന് കീഴിലുള്ള വഴിയോര വിശ്രമ കേന്ദ്രം ഉദ്ഘാടനം ചെയ്തത്. മൂന്നാറിലേക്കെത്തുന്ന വിനോദ സഞ്ചാരികള്‍ക്ക്  താമസിക്കാനും വിശ്രമിക്കാനും സൗകര്യമൊരുക്കുകയെന്ന ലക്ഷ്യത്തോടെയാണ് പദ്ധതി യാഥാര്‍ഥ്യമാക്കിയത്. മുമ്പ് സ്വകാര്യ വ്യക്തികള്‍ക്ക് കരാര്‍ അടിസ്ഥാനത്തില്‍ വാടകയ്ക്ക് നല്‍കിയായിരുന്നു കേന്ദ്രം പ്രവര്‍ത്തിച്ച് വന്നിരുന്നത്. എന്നാല്‍ ഇപ്പോള്‍ കേന്ദ്രം അടഞ്ഞ് കിടക്കുന്നതിനാല്‍ കെട്ടിടവും പരിസരപ്രദേശങ്ങളും കാട് കയറിയ അവസ്ഥയിലാണ്. പരിപാലനമില്ലാതെ കിടന്നാല്‍ ലക്ഷങ്ങള്‍ മുടക്കി നിര്‍മിച്ചിട്ടുള്ള കെട്ടിടം ക്രമേണ നാശത്തിലേക്ക് കൂപ്പുകുത്തും. സഞ്ചാരികളെ ആകര്‍ഷിക്കാന്‍ സ്ഥല സൗകര്യങ്ങള്‍ക്കൊപ്പം നേര്യമംഗലം വനമേഖലയുടെ ഭംഗിയാസ്വദിക്കാനും കഴിയും വിധത്തിലാണ്  കെട്ടിടം സ്ഥിതി ചെയ്യുന്നത്. ടൂറിസം വകുപ്പ് നേരിട്ട് നടത്തിയാല്‍ പോലും വരുമാനമുണ്ടാക്കാന്‍ കഴിയുന്ന പദ്ധതിയാണ് കാട് കയറി നശിക്കുന്നത്. നിലവിലെ കെട്ടിട സ്ഥല സൗകര്യങ്ങള്‍ വൃത്തിയാക്കിമോടി പിടിപ്പിച്ച് സഞ്ചാരികളെ ആകര്‍ഷിക്കും വിധം താമസ സൗകര്യമൊരുക്കിയാല്‍ പദ്ധതിയിലൂടെ ടൂറിസം വകുപ്പിന് മെച്ചപ്പെട്ട വരുമാനം കണ്ടെത്താം. സ്വകാര്യ വ്യക്തികള്‍ക്ക് വാടകയ്ക്ക് നല്‍കിയാലും പദ്ധതി പരിപാലനമില്ലാതെ നശിക്കുന്നത് ഒഴിവാക്കാം.