ഇടുക്കി: യൂത്ത് കോൺഗ്രസ് ഉടുമ്പൻചോല നിയോജക മണ്ഡലം പ്രസിഡന്റ് ആനന്ദ് തോമസിനെ അറസ്റ്റ് ചെയ്ത തങ്കമണി എസ് ഐ ഐൻ ബാബുവിനെ സസ്പെൻഡ് ചെയ്യണമെന്നാവശ്യപ്പെട്ട് യൂത്ത് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ കട്ടപ്പന ഡിവൈഎസ്പി ഓഫീസിലേക്ക് ശനിയാഴ്ച രാവിലെ 10ന് മാർച്ച്‌ നടത്തും. സംസ്ഥാന വൈസ് പ്രസിഡന്റ്‌ അബിൻ വർക്കി ഉദ്ഘാടനം ചെയ്യും. കൊടും ക്രിമിനലുകളെ അറസ്റ്റ് ചെയ്യുന്ന പോലെയാണ് ആനന്ദിനെ കസ്റ്റഡിയിലെടുത്തത്. ഒരു പോലീസുകാരന്റ കൈയോട് ചേർത്ത്  വിലങ്ങണിയിച്ച് അറസ്റ്റ് ചെയ്തത് നിയമ വിരുദ്ധമാണ്. ഇതിനെതിരെ മനുഷ്യാവകാശ കമ്മിഷന് പരാതി നൽകുകയും മറ്റ് നിയമ നടപടികൾ സ്വീകരിക്കുകയും ചെയ്യും.

ഈ നിയമവിരുദ്ധ അറസ്റ്റിന് ഒത്താശ ചെയ്തത് കട്ടപ്പന ഡിവൈഎസ്പിയാണ്. പൊലീസിന്റെ  ധാർഷ്ട്യം അംഗീകരിക്കാൻ കഴിയില്ലെന്നും പ്രതികാര ബുദ്ധിയോടെയുള്ള പൊലീസ് നടപടിക്കെതിരെ പ്രതിഷേധം ശക്തമാക്കുമെന്നും ഭാരവാഹികൾ അറിയിച്ചു. വാർത്താസമ്മേളനത്തിൽ യൂത്ത് കോൺഗ്രസ്‌ ജില്ലാ പ്രസിഡന്റ്‌ ഫ്രാൻസിസ് ദേവസ്യ, ജില്ലാ സെക്രട്ടറി മഹേഷ്‌ മോഹനൻ, കട്ടപ്പന മണ്ഡലം പ്രസിഡന്റ്‌ അലൻ സി മനോജ്‌, അഭിലാഷ് വി ജോസ്, അലൻ എസ് പുലിക്കുന്നേൽ എന്നിവർ പങ്കെടുത്തു.