ഇടുക്കി: അച്ഛന്‍ ഓടിച്ച ഓട്ടോറിക്ഷ മറിഞ്ഞ് മകന്‍ മരിച്ചു. ഓട്ടോ ഡ്രൈവര്‍ ഉടുമ്പന്നൂര്‍ പനച്ചിക്കല്‍ സുനീറിന്റെ മകന്‍ മുഹമ്മദ് ഷഫ്ഹാന്‍(10) ആണ് മരിച്ചത്. തിങ്കളാഴ്ച രാത്രി ഒമ്പതോടെ ഉടുമ്പന്നൂര്‍ തൃക്കയില്‍ ക്ഷേത്രത്തിനുസമീപമായിരുന്നു അപകടം. റോഡിന് കുറുകെ കടന്ന കുട്ടിയെ ഇടിക്കാതിരിക്കാന്‍ ഓട്ടോറിക്ഷ വെട്ടിച്ചപ്പോള്‍ നിയന്ത്രണംവിട്ട് മറിയുകയായിരുന്നു. സമീപത്തെ ഹോട്ടലില്‍ നിന്ന് ഭക്ഷണം കഴിച്ചിറങ്ങിയ സംഘത്തിലെ കുട്ടിയാണ് പെട്ടെന്ന് റോഡിനുകുറുകെ വന്നത്.

ഈ കുട്ടിയുടെ ദേഹത്ത് തട്ടിയ ഓട്ടോറിക്ഷ റോഡില്‍ വട്ടംമറിഞ്ഞു. വാഹനത്തിന്റെ അടിയില്‍പ്പെട്ട മുഹമ്മദ് ഷഫ്ഹാനെ ഉടന്‍തന്നെ മുതലക്കോടത്തെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഓട്ടോ ഓടിച്ചിരുന്ന സുനീറിനും വാഹനം തട്ടിയ കുട്ടിക്കും പരിക്കുണ്ട്. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു. ഉടുമ്പന്നൂര്‍ പാറേക്കവല എല്‍പി സ്‌കൂള്‍ വിദ്യാര്‍ഥിയാണ്. മൃതദേഹം സ്‌കൂളില്‍ പൊതുദര്‍ശനത്തിനു ശേഷം കബറടക്കം നടത്തി.