ഇടുക്കി: ജില്ലയില്‍ ആറ് മാസത്തിനിടെ 5,54,64,779 രൂപയുടെ ഓണ്‍ലൈന്‍ തട്ടിപ്പ്. 55 കേസുകളാണ് ഈ വര്‍ഷം ഇതുവരെയായി രജിസ്റ്റര്‍ ചെയ്തിരിക്കുന്നത്. 2023 ല്‍ 52 കേസുകളിലായി 7,18,00,000 രൂപയുടെ തട്ടിപ്പാണ് നടന്നത്. വാട്‌സാപ്പിലും ഇ-മെയിലിലും മറ്റും ലഭിക്കുന്ന ലിങ്കുകളില്‍ ക്ലിക്ക് ചെയ്യുന്നതുവഴി  ആപ്പുകള്‍ ഫോണില്‍ ഇന്‍സ്റ്റാളാകുകയും ഈ ആപ്പുകള്‍ വഴി ഒടിപി അടക്കമുള്ള വിവരങ്ങള്‍ ചോര്‍ത്തിയാണ് തട്ടിപ്പുകള്‍ നടത്തിയിരിക്കുന്നത്. ലഹരിമരുന്ന് അടങ്ങിയ കൊറിയര്‍ പിടിച്ചെടുത്തെന്നും പ്രതിച്ചേര്‍ക്കാതിരിക്കുന്നതിനായി പണം നല്‍കണമെന്നും ആവശ്യപ്പെട്ട് തെടുപുഴ സ്വദേശിനിയില്‍ നിന്ന് വന്‍തുക ഗൂഢസംഘം തട്ടിയെടുത്തിരുന്നു. ഈ തുക തിരിച്ചുപിടിക്കുന്നതിനായുള്ള ശ്രമത്തിലാണ് പൊലീസ്. സാമ്പത്തിക തട്ടിപ്പിനിരയായാല്‍ ഒരുമണിക്കൂറിനകം 1930 എന്ന നമ്പരില്‍ അറിയിക്കണമെന്നും  പൊലീസ് സ്റ്റേഷനുകള്‍, തദ്ദേശ സ്വയംഭരണ സ്ഥാപനങ്ങള്‍ എന്നിവ കേന്ദ്രീകരിച്ച് സൈബര്‍ ബോധവല്‍ക്കരണം നടത്തുന്നതിന് പദ്ധതിയുണ്ടെന്നും പൊലീസ് മേധാവി ടി കെ വിഷ്ണു പ്രദീപ് അറിയിച്ചു.