ഇടുക്കി: ജില്ലയിലെ ആദ്യ മില്‍ക്ക് എ.ടി.എം മൂന്നാറില്‍  ക്ഷീര വികസന മൃഗസംരക്ഷണ വകുപ്പ് മന്ത്രി ജെ ചിഞ്ചുറാണി ഉദ്ഘാടനം ചെയ്തു. ദേവികുളം ബ്ലോക്കിലെ ലക്ഷ്മി ക്ഷീരസഹകരണ സംഘത്തിന്റെ ആഭിമുഖ്യത്തില്‍ ആരംഭിച്ച മില്‍ക്ക് എ.ടി.എം ഉപഭോക്താക്കളുടെ സമയവും സൗകര്യവും അനുസരിച്ച് ഏത് സമയത്തും പാല്‍ വാങ്ങുന്നതിന് സഹായിക്കുന്നു. മെഷീനില്‍ നിക്ഷേപിക്കുന്ന തുകക്കനുസരിച്ച് 24 മണിക്കൂറും പാല്‍ ലഭിക്കും. 10, 20, 50, 100 നോട്ടുകളില്‍ ഏതെങ്കിലുമൊന്ന് യന്ത്രത്തില്‍ നിക്ഷേപിക്കാം. 200 ലിറ്റര്‍ സംഭരണശേഷിയുള്ള മെഷീനാണ് ഇതിനായി സ്ഥാപിച്ചിരിക്കുന്നത്. 1000 ലിറ്ററോളം പാല്‍ ഒരു ദിവസം ഇതുവഴി ഗുണഭോക്താക്കളിലേ എത്തിക്കുക എന്നതാണ് ലക്ഷ്യം. ഏകദേശം 4 ലക്ഷത്തിലധികം രൂപ ചിലവഴിച്ച പദ്ധതിക്ക് ക്ഷീരവികസന വകുപ്പ് 120000/ രൂപ ധനസഹായം നല്‍കി. ദേവികുളം എം.എല്‍.എ. അഡ്വ. എ. രാജ,  മച്ചിപ്ലാവ് ക്ഷീരസഹകരണ സംഘം പ്രസിഡന്റ് പോള്‍ മാത്യു, കെഎസ്എംഎസ്എ ജില്ലാ പ്രസിഡന്റ് കെ പി. ബേബി, പാണ്ടിപ്പാറ ക്ഷീരസഹകരണ സംഘം പ്രസിഡന്റ് സോണി ചൊള്ളാമഠം ക്ഷീരവികസന വകുപ്പ് ജോയിന്റ് ഡയറക്ടര്‍ ശാലിനി ഗോപിനാഥ്, ഡെപ്യൂട്ടി ഡയറക്ടര്‍ ഡോ. ഡോളസ് പി. ഇ. ക്വാളിറ്റി കണ്‍ട്രോള്‍ ഓഫീസര്‍ അഞ്ജു കുര്യന്‍, ക്ഷീരവികസന ഓഫീസര്‍ ജാസ്മിന്‍ സി. എ. തുടങ്ങിയവര്‍ പങ്കെടുത്തു.