ആകാശത്ത് ഇന്ന് സൂപ്പര്‍മൂണ്‍, ബ്ലൂ മൂണ്‍ പ്രതിഭാസം കാണാം. നാലു പൂര്‍ണചന്ദ്രന്‍മാരുള്ള ഒരു കാലയളവിലെ മൂന്നാമത്തെ പൂര്‍ണചന്ദ്രനാണ് ബ്ലൂ മൂണ്‍ എന്നറിയപ്പെടുന്നത്. ഭൂമിയുടെ ഭ്രമണപഥത്തോട് ചന്ദ്രന്‍ കൂടുതല്‍ അടുത്തുനില്‍ക്കുന്ന സമയത്തെ പൂര്‍ണ ചന്ദ്രനെയാണ് സൂപ്പര്‍മൂണ്‍ എന്ന് വിളിക്കുന്നത്. ഇവ രണ്ടും ഒരുമിച്ച് വരുന്നതിനാലാണ് സൂപ്പര്‍മൂണ്‍ബ്ലൂമൂണ്‍ എന്നുവിളിക്കുന്നത്. തിങ്കളാഴ്ച രാത്രി മുതല്‍ 3 ദിവസത്തേക്ക് ഈ പ്രതിഭാസം തെളിഞ്ഞ അന്തരീക്ഷത്തില്‍ കാണാനാകും.
വര്‍ഷത്തില്‍ മൂന്നോ നാലോ തവണ സൂപ്പര്‍മൂണ്‍ പ്രതിഭാസം ഉണ്ടാകാറുണ്ടെന്ന് നാസ പറയുന്നു. 1979ലാണ് സൂപ്പര്‍മൂണെന്ന വിളിപ്പേരു ലഭിച്ചത്. അടുത്ത മൂന്നു പൂര്‍ണചന്ദ്രന്‍മാരും സൂപ്പര്‍മൂണായിരിക്കും. അടുത്തസൂപ്പര്‍മൂണിനെ കാണാനാകുന്നത് സെപ്റ്റംബര്‍ 17, ഒക്ടോബര്‍ 17, നവംബര്‍ 15 തീയതികളിലായിരിക്കും. രണ്ടുതരത്തിലുള്ള ബ്ലൂ മൂണുകളുണ്ട്. നിശ്ചിത കാലയളവില്‍ ദൃശ്യമാകുന്നതും മാസത്തില്‍ ദൃശ്യമാകുന്നതും. ഇപ്പോഴത്തേത് സീസണലാണ്. ഒരു സീസണില്‍ നാലു പൂര്‍ണചന്ദ്രന്‍മാരെ കാണാനാകും. അതില്‍ മൂന്നാമത്തെതാണ് സീസണല്‍ ബ്ലൂ മൂണ്‍. 
2027ലാണ് അടുത്ത സീസണല്‍ ബ്ലൂ മൂണ്‍ ദൃശ്യമാകുക.
സൂപ്പര്‍ മൂണും സീസണല്‍ ബ്ലൂ മൂണും സാധാരണമാണെങ്കിലും രണ്ടു പ്രതിഭാസവും ചേര്‍ന്നു വരുന്നത് അപൂര്‍വമായാണ്. 10 മുതല്‍ 20 വര്‍ഷത്തിനിടയിലാണ് ഈ പ്രതിഭാസം സംഭവിക്കുന്നത് 2037 ജനുവരിയിലായാരിക്കും അടുത്ത സൂപ്പര്‍ മൂണ്‍ ബ്ലൂ മൂണ്‍.