ഇടുക്കി: ഇടുക്കി രൂപതാ 4-ാമത് മരിയന്‍ തീര്‍ഥാടനം സെപ്റ്റംബര്‍ 7  ശനിയാഴ്ച നടക്കുമെന്ന് രൂപതാ വികാരി ജനറാള്‍ മോണ്‍. ജോസ് പ്ലാച്ചിക്കല്‍ വാര്‍ത്താ സമ്മേളനത്തില്‍ അറിയിച്ചു. തീര്‍ത്ഥാടനത്തിന്  രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍  നേതൃത്വം നല്‍കും.രാജാക്കാട് ക്രിസ്തുരാജാ ഫൊറോനാ ദേവാലയത്തില്‍ നിന്നും ആരംഭിക്കുന്ന കാല്‍നട തീര്‍ത്ഥാടനം ഉച്ചകഴിഞ്ഞ് 1.30 ന് രാജകുമാരി ദൈവമാതാ തീര്‍ഥാടന ദൈവാലയത്തില്‍ എത്തിച്ചേരും. തുടര്‍ന്ന് നടക്കുന്ന തിരുകര്‍മങ്ങള്‍ക്ക് സീറോ മലബാര്‍ സഭയുടെ കൂരിയാ മെത്രാന്‍ മാര്‍ സെബാസ്റ്റ്യന്‍ വാണിയപുരക്കല്‍ മുഖ്യ കാര്‍മികത്വം വഹിക്കും. രൂപതയിലെ മുഴുവന്‍ വൈദികരും സഹകാര്‍മികരാകും. 

തീര്‍ത്ഥാടനത്തിന്റെ ഭാഗമായി അടിമാലി സെന്റ് ജൂഡ് ഫൊറോനാ ദൈവാലയത്തില്‍ നിന്നും സെപ്റ്റംബര്‍ 6 വെള്ളിയാഴ്ച വൈകിട്ട് 3 ന് മാര്‍ ജോണ്‍ നെല്ലിക്കുന്നേല്‍ പിതാവിന്റെ നേതൃത്വത്തില്‍ കാല്‍നടതീര്‍ത്ഥാനം ആരംഭിക്കും. അടിമാലി, ആയിരമേക്കര്‍, കല്ലാര്‍കുട്ടി, വെള്ളത്തൂവല്‍, പന്നിയാര്‍കുട്ടി വഴിയാണ് തീര്‍ത്ഥാടനം രാജാക്കാട് പള്ളിയില്‍ എത്തിച്ചേരുന്നത്. തുടര്‍ന്ന് ശനിയാഴ്ച രാവിലെ 9.30ന് പ്രത്യേക പ്രാര്‍ത്ഥനകള്‍ക്കുശേഷം തീര്‍ത്ഥാടനം ആരംഭിക്കും.

തീര്‍ത്ഥാടനത്തിന്റെ ക്രമീകരണത്തിനായി വികാരി ജനറാള്‍മാരായ മോണ്‍. ജോസ് കരിവേലിക്കല്‍, മോണ്‍. ജോസ് പ്ലാച്ചിക്കല്‍, മോണ്‍. അബ്രാഹം പുറയാറ്റ്, ഫാ. മാത്യു കരോട്ടുകൊച്ചറയ്ക്കല്‍, ഫാ.ജോര്‍ജ് പാട്ടത്തേക്കുഴി, ഫാ. ജിന്‍സ് കാരയ്ക്കാട്ട്, ഫാ. ജോസഫ് മാതാളികുന്നേല്‍, ജോര്‍ജ് കോയിക്കല്‍, ജെറിന്‍ പട്ടാംകുളം എന്നിവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിക്കുന്നു.  വാര്‍ത്താ സമ്മേളനത്തില്‍ വികാരി ജനറാള്‍ മോണ്‍. ജോസ് പ്ലാച്ചിക്കല്‍ മീഡിയാ കമ്മീഷന്‍ ഡയറക്ടര്‍, ഫാ. ജിന്‍സ് കാരയ്ക്കാട്ട് കത്തോലിക്കാ കോണ്‍ഗ്രസ് പ്രസിഡന്റ്  ജോര്‍ജ് കോയിക്കല്‍ തുടങ്ങിയവര്‍ പങ്കെടുത്തു.