ഇടുക്കി: പുളിയന്മലയില്‍ അനധികൃതമായി ഹോള്‍സെയില്‍  മത്സ്യവില്‍പ്പന നടത്തിവന്നിരുന്ന വാഹനം പിടികൂടി. ബുധനാഴ്ച പുലര്‍ച്ചെ 5ന് നഗരസഭ ആരോഗ്യ വിഭാഗം നടത്തിയ പരിശോധനയിലാണ് വാഹനം പിടികൂടിയത്. പുളിയന്മല പാമ്പാടുംപാറ റോഡിലാണ് സംഭവം. പ്രധാന റോഡ് കൈയേറി പിക്കപ്പ് വാന്‍ പാര്‍ക്ക് ചെയ്താണ് വ്യാപാരം നടത്തിരുന്നത്.  വില്‍പ്പനയ്ക്ക് വച്ചിരിക്കുന്ന മീനുകളില്‍ നിന്നുള്ള മലിന ജലം റോഡിലേക്കും പ്രദേശവാസികളുടെ കൃഷിയിടങ്ങളിലേക്കും ഒഴുകുന്നത് പതിവായതോടെ കാര്‍മല്‍ സ്‌കൂളിലെ വിദ്യാര്‍ഥികളും, പ്രദേശവാസികളും നഗരസഭയുടെ ഹരിത സഭയില്‍ പരാതി നല്‍കി. ഇതിന്റെ അടിസ്ഥാനത്തിലാണ് പരിശോധന നടത്തിയത്. നാലുമാസം മുമ്പ് ഈ വില്‍പ്പനയ്‌ക്കെതിരെ നഗരസഭ നിരോധന ഉത്തരവ് നല്‍കുകയും മുഖ്യമന്ത്രിക്ക് അടക്കം പരാതി നല്‍കുകയും ചെയ്തിരുന്നു. വീണ്ടും വ്യാപാരം തുടര്‍ന്നതിനാലാണ് വാഹനത്തിനെതിരെ നടപടി സ്വീകരിച്ചത്.  340 പ്രകാരം 5000 രൂപ പിഴ ചുമത്തി. വീണ്ടും വില്‍പ്പന തുടര്‍ന്നാല്‍ കര്‍ശന നടപടികള്‍ സ്വീകരിക്കുമെന്ന് നഗരസഭ അധികൃതര്‍ പറഞ്ഞു.