കൊച്ചി ധനുഷ്‌കോടി ദേശീയപാതയില്‍ ഗതാഗതകുരുക്ക് രൂക്ഷം: സ്വകാര്യ ബസ് സര്‍വീസുകള്‍ പ്രതിസന്ധിയില്‍
കൊച്ചി ധനുഷ്‌കോടി ദേശീയപാതയില്‍ ഗതാഗതകുരുക്ക് രൂക്ഷം: സ്വകാര്യ ബസ് സര്‍വീസുകള്‍ പ്രതിസന്ധിയില്‍
ഇടുക്കി: കൊച്ചി- ധനുഷ്‌കോടി ദേശീയപാതയില്‍ ഗതാഗതകുരുക്ക് രൂക്ഷമായതോടെ അടിമാലി-മൂന്നാര്‍, മൂന്നാര്‍-മറയൂര്‍, മൂന്നാര്‍-കോവിലൂര്‍ മേഖലകളിലേക്ക് നടത്തുന്ന സ്വകാര്യ ബസ് സര്‍വീസുകള്‍ പ്രതിസന്ധി നേരിടുന്നതായി പരാതി. പ്രൈവറ്റ് ബസ് ഓപ്പററ്റേഴ്‌സ് അസോസിയേഷന്‍ അടിമാലി യൂണിറ്റ് ഭാരവാഹികളാണ് പരാതിയുമായി രംഗത്തെത്തിയത്. അടിമാലി മുതല്‍ പാതയോരങ്ങളിലെ അനധികൃത പാര്‍ക്കിങ്ങാണ് ഗതാഗത കുരുക്കിന് കാരണമാകുന്നത്. മൂന്നാര്‍, കോവിലൂര്‍, മാട്ടുപ്പെട്ടി, കാന്തല്ലൂര്‍ തുടങ്ങിയ പ്രദേശങ്ങളില്‍ സഞ്ചാരികളുടെ എണ്ണം വര്‍ധിച്ചതോടെ സ്പൈസസ് ഷോപ്പുകള്‍ പാതയോരം കൈയടക്കി. കൂമ്പന്‍പാറ, ഇരുട്ടുകാനം, ആനച്ചാല്‍ എന്നിവിടങ്ങളില്‍ റോഡിനോടുചേര്‍ന്നുള്ള സിപ് ലൈനുമായി ബന്ധപ്പെട്ടുള്ള അനധികൃത പാര്‍ക്കിങ്ങും ബസ് ഗതാഗതം തടസപ്പെടുത്തുന്നുണ്ട്. ഇതോടെ സ്വകാര്യ ബസുകള്‍ക്ക് സമയത്ത് ഓടിയെത്താന്‍ സാധിക്കാതെ വരികയും പാതി വഴിയില്‍ സര്‍വീസ് അവസാനിപ്പിക്കുകയും ചെയ്യുന്നു. ചോക്ലേറ്റ് ഫാക്ടറി, ഹോട്ടലുകള്‍, സ്പൈസസ് ഷോപ്പ് എന്നിവിടങ്ങളില്‍ എത്തുന്ന വാഹനങ്ങളുടെ പാര്‍ക്കിങ്ങിന് പാതയോരമാണ് സ്ഥാപന ഉടമകള്‍ നല്‍കുന്നത്. ഇത് കുരുക്ക് വര്‍ധിക്കാന്‍ കാരണമാകുന്നു. പ്രശ്ന പരിഹാരത്തിനായി പഞ്ചായത്ത്, പൊലീസ്, മോട്ടോര്‍ വാഹന വകുപ്പ് എന്നിവരുടെ ഇടപെടല്‍ ഉണ്ടാകണമെന്നും അല്ലാത്തപക്ഷം സമരപരിപാടികളിലേക്ക് കടക്കുമെന്നും യൂണിറ്റ് പ്രസിഡന്റ്റ് പി.സി.രാജന്‍, സെക്രട്ടറി സി.എ നവാസ്, ജോ. സെക്രട്ടറി മെല്‍ബിന്‍ ജോസ്, ട്രഷറര്‍ ജോഷി പി.ജോണ്‍ എന്നിവര്‍ വ്യക്തമാക്കി.
What's Your Reaction?
