ഇടുക്കി: മലയോര ഹൈവേയില്‍ കാഞ്ചിയാര്‍ ലബ്ബക്കടയില്‍ കാറും ബൈക്കും കൂട്ടിയിടിച്ച് യുവാവിന് പരിക്കേറ്റു. ബൈക്ക് യാത്രികന്‍ ചേറ്റുകുഴി വേളിയില്‍ റിഷോണ്‍ തോമസി(19)നാണ് ഗുരുതരമായി പരിക്കേറ്റത്. വ്യാഴാഴ്ച രാവിലെ 7.30ഓടെയാണ് അപകടം. ലബക്കട- വെള്ളിലാംകണ്ടം റോഡിലേക്ക് കാര്‍ തിരിയുന്നതിനിടെ സ്വരാജ് ഭാഗത്തുനിന്നെത്തിയ ബൈക്ക് ഇടിക്കുകയായിരുന്നു. റോഡിലേക്ക് തെറിച്ചുവീണ യുവാവിന്റെ തലയ്ക്ക് ഗുരുതരമായി പരിക്കേറ്റു. കട്ടപ്പനയിലെ സ്വകാര്യ ആശുപത്രിയില്‍ എത്തിച്ചശേഷം വിദഗ്ധ ചികിത്സയ്ക്കായി കോട്ടയത്തെ സ്വകാര്യ ആശുപത്രിയിലേക്ക് മാറ്റി. ഏതാനും നാളുകളായി മലയോര ഹൈവേയില്‍ അപകടം പതിവാകുന്നു.