ഇടുക്കി:  മുന്‍ എംഎല്‍എ പി.പി. സുലൈമാന്‍ റാവുത്തര്‍ സിപിഎമ്മിനൊപ്പം ചേര്‍ന്നുപ്രവര്‍ത്തിക്കാന്‍ തീരുമാനിച്ചു. കെപിസിസി രൂപീകരിച്ച രമേശ് ചെന്നിത്തല ചെയര്‍മാനായുള്ള 25 അംഗ തെരഞ്ഞെടുപ്പ് പ്രചരണ സമിതി അംഗത്വം രാജിവച്ചാണ് എല്‍ഡിഎഫ് സ്ഥാനാര്‍ഥികള്‍ക്ക് പിന്തുണ പ്രഖ്യാപിച്ച് സിപിഎമ്മിലെത്തിയത്. കെഎസ് യുവിലൂടെ രാഷ്ട്രീയ രംഗത്തെത്തിയ അദ്ദേഹം വി.എം. സുധീരന്‍ യൂത്ത് കോണ്‍ഗ്രസ്സ് സംസ്ഥാന പ്രസിഡന്റായിരിക്കെ സംസ്ഥാന ട്രഷറര്‍ ആയും മുല്ലപ്പള്ളി രാമചന്ദ്രന്‍ പ്രസിഡന്റായിരിക്കെ സംസ്ഥാന ജനറല്‍ സെക്രട്ടറിയായും പ്രവര്‍ത്തിച്ചു.
1982ല്‍ ഇടുക്കിയില്‍ എല്‍ഡിഎഫ് സ്ഥാനാര്‍ത്ഥിയായി മത്സരിച്ച് 1200 വോട്ടിന് പരാജയപ്പെട്ടു. 1996 ല്‍ ഇപ്പോഴത്തെ യുഡിഎഫ് ജില്ലാ ചെയര്‍മാന്‍ ജോയി വെട്ടിക്കുഴിയെ പരാജയപ്പെടുത്തി ഇടുക്കിയില്‍ നിന്ന് എല്‍ഡിഎഫ് എംഎല്‍എ ആയി നിയമസഭയിലെത്തി. രണ്ട് തവണ ഇടുക്കി മണ്ഡലത്തില്‍ സ്വതന്ത്രനായി മത്സരിക്കുകയും 30000 വോട്ടുകള്‍ വീതം നേടുകയും ചെയ്തിരുന്നു. രാഷ്ട്രീയ പ്രവര്‍ത്തന പരിചയമുള്ള റാവുത്തറുടെ വരവ് അനുകൂലമാകുമെന്ന വിലയിരുത്തലിലാണ് എല്‍ഡിഎഫ് ക്യാമ്പുകള്‍.