ഇടുക്കി: മൂന്നാര്‍ റെയിന്‍ ഫോര്‍ട്ടി പെനാല്‍റ്റി ഷൂട്ടൗട്ട് ഫുട്‌ബോള്‍ മത്സരം 3ന് നടക്കും. 
ടൂര്‍ണമെന്റ് നടത്തിപ്പിനുള്ള ഒരുക്കങ്ങള്‍ പൂര്‍ത്തീകരിച്ചതായി സംഘാടകര്‍ അറിയിച്ചു. പഴയ മൂന്നാര്‍ ഹൈ ഓള്‍ട്ടിറ്റിയൂഡ് സ്റ്റേഡിയത്തിലാണ് മൂന്നാം സീസണ്‍ മത്സരം നടക്കുന്നത്. എം എം മണി എംഎല്‍എ മത്സരങ്ങള്‍ കിക്കോഫ് ചെയ്യും. വൈകിട്ട് നടക്കുന്ന സമാപന സമ്മേളനം എ രാജ എം എല്‍എ, മൂന്നാര്‍ ഡിവൈഎസ്പി അലക്സ് ബേബി എന്നിവര്‍ സമ്മാനങ്ങള്‍ വിതരണം ചെയ്യും. 
അയല്‍ സംസ്ഥാനത്തുനിന്നുള്‍പ്പെടെ ടീമുകള്‍ മത്സരത്തില്‍ പങ്കെടുക്കും. സ്റ്റേഡിയത്തില്‍ രാവിലെ 9 ന് രജിസ്ട്രേഷന്‍ ആരംഭിക്കും. 6 പേരടങ്ങുന്ന ഒരു ടീമിന് 5 പെനാല്‍റ്റി കിക്കുകളാണ് ഉണ്ടാകുന്നത്. നോക്കൗട്ട് രീതിയിലാണ് മത്സരങ്ങള്‍ നടക്കുക. ഒന്ന്,രണ്ട്,മൂന്ന്,നാല് സ്ഥാനം നേടുന്നവര്‍ക്ക് യഥാക്രമം 30000, 20000, 10000, 5000 രൂപാ വീതവും കൂടാതെ വ്യക്തിഗത സമ്മാനങ്ങളും ട്രോഫികളും സമ്മാനിക്കുമെന്ന് ഗ്രീന്‍സ് മൂന്നാര്‍ പ്രസിഡന്റ് കെ എ മജീദ്, സെക്രട്ടറി ജി സോജന്‍, ട്രഷറര്‍ ബിജു മാത്യൂ, റെയ്ന്‍ 40 ഷൂട്ടൗട്ട് മത്സര ചെയര്‍മാന്‍ കെ കെ വിജയന്‍, കണ്‍വീനര്‍ ലിജി ഐസക് എന്നിവര്‍ പറഞ്ഞു.