ഇടുക്കി: ഓള്‍ കേരള കെമിസ്റ്റ് ആന്‍ഡ് ഡ്രഗ് അസോസിയേഷനും ഡ്രഗ് കണ്‍ട്രോള്‍ ഡിപ്പാര്‍ട്‌മെന്റും ചേര്‍ന്ന് ബോധവല്‍കരണ സെമിനാര്‍ നടത്തി. കട്ടപ്പന ഹില്‍ടൗണ്‍ ഓഡിറ്റോറിയത്തില്‍ എറണാകുളം അസിസ്റ്റന്റ് ഡ്രഗ് കണ്‍ട്രോളര്‍ സന്തോഷ് കെ മാത്യു ഉദ്ഘാടനം ചെയ്തു. തൃശൂര്‍ അസിസ്റ്റന്റ് ഡ്രഗ് കണ്‍ട്രോളര്‍ ഡോ. സജു ആര്‍. ആന്റിമൈക്രോബിയല്‍ പ്രതിരോധവും പൊതുബോധവല്‍ക്കരണവും എന്ന വിഷയത്തെക്കുറിച്ച് ക്ലാസെടുത്തു. 
ആന്റി ബയോട്ടിക്കുകളുടെ ദുരുപയോഗം മനുഷ്യര്‍ക്കുണ്ടാക്കുന്ന വിപത്തുകളെക്കുറിച്ചും സ്വീകരിക്കേണ്ട പ്രതിരോധ നടപടികളെക്കുറിച്ചും സെമിനാറില്‍ ക്ലാസുകള്‍ നടത്തി. മരുന്നുകളുടെ ദുരുപയോഗം സംബന്ധിച്ച കാര്യങ്ങളില്‍ ഉണ്ടാകുന്ന നിയമ നടപടികളെക്കുറിച്ച് എഡിസി സന്തോഷ് കെ മാത്യു വിശദീകരിച്ചു. ജില്ലാ ഡ്രഗ് ഇന്‍സ്‌പെക്ടര്‍ മാര്‍ട്ടിന്‍ ജോസഫ് അധ്യക്ഷനായി. എകെസിഡിഎ ജില്ലാ പ്രസിഡന്റ് ജെയ്‌സണ്‍ ജോര്‍ജ്, ജില്ലാ സെക്രട്ടറി അജിമോന്‍ ജോസഫ് എന്നിവര്‍ നേതൃത്വം നല്‍കി.