ഇടുക്കി: കട്ടപ്പന ഇരട്ടയാര്‍ റോഡില്‍ പേഴുംക്കവലക്ക് സമീപമുള്ള വെള്ളക്കെട്ട് അപകട ഭീഷണി ഉയര്‍ത്തുന്നു. ഓട നിര്‍മാണത്തിലെ അശാസ്ത്രിയതയാണ് മഴപെയ്യുമ്പോള്‍ വെള്ളക്കെട്ട് രൂപപ്പെടാന്‍ കാരണമെന്നാണ് ഉയരുന്ന ആക്ഷേപം. സമീപത്തുള്ള വീട്ടിലേക്കും സ്ഥാപനത്തിലേക്കും കുട്ടികളടക്കമുള്ളവര്‍ എത്തുന്നത് ഈ മലിന ജലത്തിലൂടെയാണ്. ദിവസങ്ങളായി കെട്ടിക്കിടക്കുന്ന വെള്ളത്തില്‍ നിന്നും ദുര്‍ഗന്ധവും വമിക്കുന്നുണ്ട്. വെള്ളം ഒഴുകിപ്പോകേണ്ട ഓടയില്‍ പൂര്‍ണമായും മണ്ണ് നിറഞ്ഞ അവസ്ഥയാണ്. വെള്ളം കെട്ടിക്കിടക്കുന്നതുകൊണ്ട് സാംക്രമിക രോഗങ്ങള്‍ പടരാനും സാധ്യതയുണ്ട്. ആരോഗ്യ വകുപ്പിന്റെ ഭാഗത്തു നിന്നും അടിയന്തിര ഇടപെടലുണ്ടാകണമെന്നാണ് ആവശ്യമുയരുന്നത്.