ഇടുക്കി: ദുരന്തഭൂമിയായ വയനാട്ടില്‍ വീട് വച്ച് നല്‍കുന്നതിന് വ്യാപാര വ്യവസായ സമിതി കട്ടപ്പന യൂണിറ്റ് സമാഹരിച്ച തുക ജില്ലാ സെക്രട്ടറി സാജന്‍ കുന്നേലിന് കൈമാറി.
വയനാടിന് ഒരു കൈത്താങ്ങ് എന്ന പേരില്‍ സംസ്ഥാന കമ്മിറ്റി 14 വീടുകളാണ് നിര്‍മിച്ചുനല്‍കുന്നത്. ഒരു ജില്ലയില്‍ നിന്നും ഒരു വീട് എന്ന ക്രമത്തിലാണ് പദ്ധതി ആവിഷ്‌കരിച്ചിരിക്കുന്നത്. ഇതിനായി സമിതിയുടെ നേതൃത്വത്തില്‍ വ്യാപാരികള്‍ നിന്നുമാണ് പണം സമാഹരിക്കുന്നത്. ജില്ലയില്‍ ആദ്യം പണം സമാഹരിച്ച് കൈമാറിയ യൂണിറ്റാണ് കട്ടപ്പന. വിഷയവുമായി ബന്ധപ്പെട്ട് വ്യാപാരികളെ സമീപിക്കുമ്പോള്‍ പൂര്‍ണ പിന്തുണയാണ് ലഭിക്കുന്നതെന്ന് സാജന്‍ കുന്നേല്‍ പറഞ്ഞു. യോഗത്തിനോടനുബന്ധിച്ച് കട്ടപ്പന യൂണിറ്റ് സെക്രട്ടറിയായി ജി എസ് ഷിനോജ്, ഏരിയ പ്രസിഡന്റായി എം ആര്‍ അയ്യപ്പന്‍കുട്ടി, ഏരിയ ട്രഷററായി  ആല്‍വിന്‍ തോമസ് എന്നിവരെയും തിരഞ്ഞെടുത്തു. സംഘടനയില്‍ വനിതാ പ്രതിനിധിയായി  എക്‌സിക്യൂട്ടീവ് കമ്മിറ്റിയിലേക്ക് എസ് ആര്‍ ശോഭനയെയും തിരഞ്ഞെടുത്തു . യോഗത്തിന് സമിതി  ജില്ലാ വൈസ് പ്രസിഡന്റ് മജീഷ് ജേക്കബ്, പിജെ കുഞ്ഞുമോന്‍ , പി കെ സജീവന്‍, എം ജഹാംഗീര്‍ , റെജികുമാര്‍ തുടങ്ങിയവര്‍ സംസാരിച്ചു.